新聞

2019年12月14日

2017/10/12 (週四) 12:39上午

NEWS力場 奶媽處女作新猷 40分鐘讀完冇人掟嘢

特首林鄭月娥新上場,刻意畀人同以前特首作風唔同嘅感覺,佢噚日發表「處女作」施政報告,當然畀人煥然一新印象,佢一如首次去立法會咁,企喺主席隔籬宣讀報告,唔似得前特首CY咁企喺前面(下圖)。「奶媽」特首事先講明唔會讀晒四萬九千字嘅施政報告,因可能超過4個鐘,佢噚日真係只用40分鐘讀完報告撮要,自然冇人會「恰眼瞓」,當然唔會悶親嚟捧場嘅「第一先生」林兆波啦。

兩場合換旗袍連鞋

「奶媽」行入議事廳時,雖然有泛民議員高呼「林鄭月娥、唔好扮傻」、「DQ議員可恥」口號,但冇人衝出嚟示威掟嘢,明顯同議員關係,好過以前好多。佢喺報告便提到要扭轉過往一段時間「不必要的猜忌」,和「對人不對事的風氣」。

佢又引用特區成立二十周年主題曲《香港‧我家》歌詞鼓勵港人。至於另一新猷係記者會畀網媒參與,增長至75分鐘畀多啲人問,當宣布記者會結束時,有記者話「未夠75分鐘」,「奶媽」立即答多兩題。另外,佢喺衣着都有考究,朝早去立會着淺金色旗袍襯米白色鞋,下晝去記者會換咗藍白色旗袍配黑色高踭鞋。

施政報告提及會嘗試營造有利《基本法》23條立法,及在人大「831」框架下推動政改嘅社會氛圍。「奶媽坦言如果有一天佢進入立法會時,得到議員基本尊重,或反映有機啟動爭議議題。

;