娛樂

2019年7月22日

2019/05/17 (週五) 12:03上午

黃妍 有態度的麵包

夢想與麵包,你的選擇是?
創作歌手黃妍的選擇是追夢,毅然放棄一份收入穩定的工作,全身投入歌唱事業,雖然這段路走來不易,但她卻沒有後悔,「當出嚟社會工作冇得做音樂,日日都要OT,嗰吓我先發現原來音樂對我嚟講真係好重要!」

撰文:卓妙燕、攝影:ChaseK
髮型:Hillnex @Alex’s team
化妝:Frances@Jessica’s team
場地:Redmr 紅人派對

黃妍(Cath)最近推出新歌《小鹿撞樹記》,聯同之前3首以夏、秋、冬為題材的歌,組成4部曲,她希望透過新歌令大家去重溫暗戀的心情,「我覺得春天好似係情竇初開嘅感覺,鍾意一個人就會有少少變態、精神分裂,你成日諗住佢,咁佢嘅一舉一行又會好影響你,所以呢樣嘢同春天好似!」

突破自己
透過新歌帶出暗戀的心情,Cath坦言也會回想起昔日暗戀別人的感覺,「最深刻印象係我中一嗰時,有個師兄好靚仔,我嗰陣個樣好薯,戴眼鏡、短頭髮同冇咩自信。有時我哋要轉課室,經過佢課室會挺直條腰行,同偷偷地望吓佢!」Cath認為在自己喜歡的人面前,總會心如小鹿亂撞,十分緊張。
今次新歌MV足足拍了15小時,Cath指這次MV 比以往所拍的還要辛苦,「我喺呢個MV不停突破緊自己,因為今次好需要演技,仲要演得有少少浮誇,所以好難啊!所有嘢都係第一次嘗試,仲要有一個靚仔做對手,但都好期待個成品。」至於是否想挑戰拍劇?她說如果有機會當然想試,更想飾演與自己性格相似的角色!

堅持理想
Cath在做歌手前本來有一份收入穩定的工作,但為了夢想而決定放棄,Cath直言掙扎了很久,「有啲嘢你唔趁後生去試,你呢一世都可能唔會有機會再試到。我希望呢個決定喺我10年後諗番都唔會後悔,至少依家失敗咗,我都仲後生,有手有腳,但如果20年後你醒覺『我真係好鍾意做音樂喎』,咁就太遲喇!」當初決定做歌手雖然令父母很擔心,但Cath剛出道半年的努力和成績父母也看在眼內,所以現在也很接受和支持她。
Cath表示想做歌手,有部分原因是因為「周杰倫」,「我由啱啱升上中學就開始聽周杰倫嘅歌,當時好少唱作歌手,佢又唱得又作得,咩樂器都識,我就覺得呢個人真係好完美!」更稱當初學結他都是為了Cover他的歌,如果將來有機會希望可以與周杰倫合作!

;