娛樂

2019年7月17日

2019/03/21 (週四) 12:00上午

都市專訪 聽覺盛宴 蘇永康

蘇永康上次在紅館開個唱已是2011年,過去曾與任賢齊、梁漢文和黃家強組成《男人幫》開演唱會,並到各地巡演,惟欠再開紅館騷。即使經理人多次慫恿,他都不受動搖,直到17年與澳門中樂團合作,效果非常震撼,令身為「舞台老手」的蘇永康差點出錯,「嘩!真係好精采。睇到我唔識入歌,要人提我,入喇!入喇!」受衝擊後的他立即拍板要以中樂為題在紅館開個唱,盼為粉絲帶來一場聽覺的盛宴。

撰文:黃寶華
攝影:Sing
髮型:Moe@Fifth salon
化妝:Maggie Lee
場地:THE LUXE MANOR HOTEL @ DADA BAR

久違了的紅館騷,蘇永康(阿公)坦言這幾年不是沒想過開,但因紅館的場地與巡演的表演設計不符而卻步,「海外多數係Casino嘅場,嗰啲較容易行落觀眾度, 近人多啲,但唔係好啱喺紅館做,因為嗰度唔可以即時落台,我覺得個Run Down 上唔到紅館。」直至遇上中樂團,他才決意要開個人紅館騷。

中樂的震撼
兩年前阿公受邀出席澳門藝術節與當地中樂團合作,他二話不說就答應,因為在20年的唱歌生涯中,他的唱片都沒有中樂元素,所以這次的合作令他躍躍一試,「香港嘅管弦樂團、 小交響樂團同業餘交響樂團,我全部試過晒,咁好多音樂元素我都試過,就係未染指過中樂。音樂人當然好想涉獵吓唔同境界又學吓嘢,咁17年就係一個幾好嘅機會。」當時的演出令他意猶未盡,更悟出中樂的吸引力絕不輸流行元素,同樣可以很精采,「On Show嗰陣當啲燈打落去樂手度,其實觀眾嘅吸引力都吸咗去樂手度。如果樂手本身係有Showmanship嘅話,佢個吸引力係唔低於舞台上面爆煙花,或者有20個Dancers,因為大家個鑑賞角度唔同,觀眾係拍爛手掌。」
6月的紅館騷會與廣州中樂團合作,86位樂手加上樂隊和伴唱等,共93人,人數可說是創紅館紀錄,但阿公指人數多難 Encore,「我講定先,你買飛入嚟,唔好諗住有好多嘅Encore,因為我將啲歌塞到幾實吓。平時嗰啲演唱會10人、8人,隊Band隨時Jam一隻歌都仲得,但呢次80幾人點Jam都Jam 唔到。」他期望在聽覺上能帶給觀眾豐富的音樂元素,因今次演唱會集中於音樂性,視覺的享受不多。他又搞笑地為許志安的個唱做宣傳,「要爆煙花,有20個Dancer,跟住人從天跌落嚟,如果想睇呢啲咁你9月去聽許志安。」

為囝囝着想
阿公的兒子Jazz今年兩歲,已經熱愛聽歌,想不到囝囝愛聽的歌竟成為他表演的靈感,「我想試下將《All That Jazz 》嘅拉丁節奏用中樂去玩,再加啲離譜嘅元素,可能會捽碟,呢個係我個仔畀靈感我,因為佢鍾意Bruno Mars 嗰首《Uptown Funk 》。」而新歌《All That Jazz 》正是講父子情,歌詞寫阿公為人父後的轉變。阿公認為囝囝出世後,自己有了更多耐性去教仔,「對小朋友係急唔嚟,喺工作上可以急,同埋主導性都幾高。但對住小朋友,你唔可以畀佢主導你,你要同佢磨合,因為佢未識表達你要去揣摩佢嘅性格。」
為人父後的阿公目光亦變得更長遠,開始注重健康,多做運動及少食油膩食物。他坦言做運動除了為演唱會外,亦不希望自己成為別人的負擔,「 香港人均壽命90幾歲,60歲都仲有一段路要行,身體係好重要。首先唔好令自己老年難過,第二唔好構成小朋友嘅負擔,希望有健康身體可以睇個仔耐啲。」除運動外,他亦找歌唱老師開聲及訓練聲帶,盼在演唱會中保持水準,讓粉絲能聽得投入。

;