娛樂

2019年8月24日

2017/03/13 (週一) 12:00上午

都市專訪 有底線 陳潁熙

最近學生妹Look Hit爆,令無綫劇集《親親我好媽》的江嘉敏、《迷》的簡淑兒成功彈起,就連在她們身邊的角色也受到網民的關注,好像在《迷》中飾演簡淑兒的好友陳潁熙,亦逐漸為人熟悉。不過陳潁熙直言拒為上位而大行性感路線,或是在外形上的改造,堅稱自己有底線!

撰文:林依炫 攝影:Allen

陳潁熙是無綫第26期藝員訓練班出身,入行4年的她已演出超過20部電視劇,但大多數都是閒角,「以前做嘅角色完全冇對白,做過路人甲乙丙、妓女,捱咗3、4年都幾灰,諗過好多次想放棄。」幸而每逢萌生放棄的念頭時,希望便會突然出現在眼前,而這次就是有機會接拍《迷》。

被換角
不過機會來臨時,自己也要懂得把握,而對仍然是新人的陳潁熙,以前亦錯失了很多次大好機會,一次最可惜的便是她曾經可以參演《On Call 36小時II》的拍攝,「嗰時畀咗個好好嘅角色我,但得兩日時間去睇劇本,足足有兩頁紙滿晒嘅對白,仲同楊怡有對手戲,我冇瞓覺,好認真咁睇,但原來我個方法錯咗,記唔到入腦,後尾嘥咗成隊Crew個幾兩個鐘去拍,最後換咗黃心穎去演呢個角色。」為了這個角色,陳潁熙更不惜剪頭髮去配合,但得悉被換角後,令她情緒崩潰,日日以淚洗面。「嗰時覺得自己好錯,會諗死啦,新人咩都唔識,冇人會再搵我,要再由路人甲乙丙做起,慢慢建立返大家對我嘅信心。」
做自己
除了等機會到來,陳潁熙都會主動出擊,為了想專注喜愛的唱歌事業,在接拍《迷》前已與無綫由合約藝員轉為特約演員,另外還有自己搵老師學唱歌,務求有新突破及嘗試。陳潁熙透露:「上年有人想簽我做女子組合其中一個成員,但我覺得要考慮清楚啲,同埋接受唔到其他因素,例如對我外形有啲要求,要改造……但我想做番自己,保持番我自己個Look。」現時微整型風氣普及,但陳潁熙卻不會盲目跟風,就算要她行性感,甚至以全裸演出博上位等,陳潁熙均一一拒絕!「我介意㗎,我又冇其他女仔咁好身材,自己都有個底線,着三點式都得嘅,始終我都想專注番我最鍾意嘅唱歌,諗唔到有咩理由要接,哈哈。」

;