新聞

2019年12月11日

2019/08/06 (週二) 01:48上午

田北辰︰林鄭遲一天回應 香港流多一天血

立法會議員田北辰昨日到荃灣示威區與示威者交談,冀了解他們的看法和感受,但大多數人沒理會他,他在現場指特首林鄭月娥很久沒有出來,無聆聽市民的聲音,便無法掌握最新的民情,田其後又在自己的社交網站FB發帖,表示自己支持成立獨立調查委員會,林鄭遲一天回應,香港又流多一天血。

田北辰FB帖全文:

今日我去咗荃灣警署。原因好簡單,呢度係我自己選區,我地區辦事處一出嚟就係。其實去之前,我已經知道,我冇能力阻止任何事發生,亦好大機會兩邊不討好。唔緊要啦,榮辱事小,只係因為之前示威者包圍警署,似乎都係因為入面有被捕示威者,如果呢度又係咁,起碼我可以去嘗試搞清楚乜事。我亦有同事喺天水圍做同樣嘅嘢,問題太複雜,解決一個得一個。

我嘗試問在場嘅年青人,有冇咁嘅事,似乎係冇,我亦冇能力阻止有人拎起第一塊石頭。我一路睇住人用石頭擲入去,我當時只係諗,死物爛咗唔緊要,最緊要唔好有人受傷,當然我知道人心受傷已經挽回唔到。

成個過程,有好多人鬧我,雖然有啲係誤解,冇問題,年輕人出事,大人點都有責任。但亦有父母輩係嚟同我訴苦,我都係父母,又點會唔明白。我支持成立獨立調查委員會,亦支持完全撤回,好多人質問我,以為咁就會冇事?我問在場嘅人,有好多唔同答案,但全都贊成呢兩點可緩解至少一半怨氣。

特首,我知道你仍然覺得被誤解,我今日都被誤解,又如何呢,而家都唔係講呢啲對錯嘅時候,每日都有警員同年青人受傷,喺你治下,係唔係被誤解就全無責任呢?我知道你擔心滿足唔到所有訴求,無法平息,但做得一樣就一樣,少一個人受傷就係少一個人。遲一日做,香港又流多啲血,於心何忍呢?

;