娛樂

2019年10月20日

2019/09/20 (週五) 12:00上午

煥然一新 泳兒

因失聲和家庭巨變被迫停工3年的泳兒,藉《重新感應》演唱會再次踏上舞台,讓觀眾重新認識煥然一新的自己。這段時間經歷高山低谷,即使重創泳兒也不甘言敗!更從中成長,讓自己意識在音樂路上要繼續向前追求,今後決心以不抱悔毋忘初衷的心態過活。

採訪:黎寶倫
撰文:Boey Lau
攝影:陸羽勝
服裝及飾物:seemi image consultants
髮型 : Zivyeunghair@Hair corner K11 Musea
化妝:木子維納_Vena
場地:The AIR(The ONE)

雖然被迫停工,但其實這幾年泳兒不斷計劃自己的將來,默默耕耘,曾考慮與朋友一起做生意、學習寵物美容或者考瑜伽牌。她不諱言藝人也可以多元化發展,「做藝人唔可以太單方面,都要發掘其他唔同嘅嘢,我相信公司都會支持自己。之前啱啱入行嗰陣,我係讀會計,爸爸就話『你不如邊做會計邊唱歌啦!』嗰時我就話『吓,邊可能㗎?』但係依家諗諗吓,其實都可以㗎喎,公司條數畀我計咪得囉,仲可以叫朋友啲數畀我計賺吓外快。」
重新認識自己
聲線失而復得後,泳兒希望這次來聽演唱會的觀眾能感受其個人內心的轉變!皆因這3年裏,媽媽臥病在牀、自己失聲爛面,泳兒從低潮中改變過往不問世事的心態,以不帶一絲後悔地工作。「以往拍攝細節,我都唔會去過問,影完就算,呢次演唱會,我特別要求拍攝自己滿意嘅海報。因為開頭張相出咗,我就諗『如果我係一個要畀888蚊去買演唱會飛嘅人,見到呢張Poster,企喺消費者嘅立場,其實真係唔係幾有意欲去買。』所以就要求重影。同埋我仲親自打電話同導演傾演唱會流程,希望唔會好似以前咁揀幾首歌,唱完就算。我想有個主題,逐Part開始,想大家睇到一個有誠意同質感嘅表演。」泳兒指同事對這個轉變感到高興,雖然只是邁出一小步,但總算是好事,最起碼將事情說清楚,沒人會理解你想要甚麼。
逆境當自強
很多事情發生都始料不及,泳兒直言當時心情很無奈,「我都唔知道可以做啲咩,不過我自己係一個心智比較強嘅人。媽咪出事嘅時候,都冇顧慮過自己嘅身體,就擔當家庭支柱。無論係精神、經濟上都需要我獨力面對。所以都覺得『其實我都好勁㗎喔!』但係慢慢發覺身體開始變差,嗰陣就失咗聲,跟住仲爛面,好多事真係冇辦法即刻解決。」
一度曾抱怨為甚麼上天待自己不公,偏偏要奪走她身上最好的東西,當泳兒情緒低落時,幸好有朋友的支持,「當時聲帶唔舒服就唔想講嘢,皮膚唔好都唔想出街,唔想見人,唔想返公司。當時我啲朋友都掹住我話『你有咩同我講啊。』咁我爆喊咁同佢哋講,咁呢個都算係抒發情緒嘅其中一個出口。」而照顧病重媽媽期間,除住院外,都會尋求額外的針灸治療,涉及巨額費用。面對種種困難,她唯一的解決方法就是繼續走下去,「其實遇到困難都冇一個方程式去做,我覺得都係向前走,唔好沉淪,千祈咪挖個窿畀自己跳落去,咁樣會企唔番起身。」

;