娛樂

2019年9月16日

2019/08/16 (週五) 12:00上午

極限挑戰 張家輝 任賢齊

一個在48歲時將自己操到成個「肌肉人」、另一個 52歲時走去增肥40多磅變「肥大叔」,張家輝與任賢齊都分別曾為電影作出突破將自己推至極限,15年後再度合作拍戲,在戲中鬥智鬥力,由頭打到尾,親身上陣又拳拳到肉,惺惺相惜的兩人大呼過癮兼享受!

撰文:胡比|攝影:Sing
化妝:Man Yun Ling(張家輝)、Shing(任賢齊)
髮型:Edmond Fung@HH hair(張家輝)、Shing(任賢齊)
場地提供:海洋公園萬豪酒店

由《虎膽龍威 2》荷李活動作導演雷尼哈林(Renny Harlin)執導的新片《沉默的證人》、張家輝與任賢齊(小齊)主演,曾經當導演的兩人,今次跟雷尼合作都感到有得着!小齊表示:「導演嘅Storyboard畫得好精準,香港式係飛紙仔,有時拍拍吓演員間會有唔同嘅化學作用,大多導演都會就住演員,改動吓。不過荷李活導演就精準好多,有時我哋做完會同Renny討論叫佢改吓,不過佢會唔開心,所以我哋有時會同導演有啲唔同嘅意見。」而家輝則感到荷李活片節奏與港片很不同,並謂:「商業性嗰方面,拍完係了解多咗,因為我哋拍部片出嚟都係娛樂事業,你商業性唔高,咁梗係唔係咁好喇,吸收吓人哋唔同嘅處理方法當然係有獲益。」

香港演員的精神
兩人繼電影《大事件》 15年後再度合作,小齊憶述當年在家輝身上看到香港演員的精神,「拍《大事件》嗰陣我已經好佩服家輝,最印象深刻係有一場撞車戲,佢追住我,我跑過馬路之後就出咗鏡,當我轉頭見到有個演員被撞到飛咗出去,我就話呢個特技演員身手真係幾好,點知佢起身嘅時候,先發現……吓!原來係家輝,嘩!真係好勁。因為我賽車嘅時候成日炒車,知道嗰吓有幾痛,點知佢起身之後仲要求嚟多個,所以我覺得香港電影好多精采動作都係啲演員攞命搏出嚟!」更稱當時已經好佩服對方,這些動作都自己親身上陣,當拍這套戲時,家輝當然亦冇「渣流灘」啦!
家輝則指小齊是位多元化的演員,除了歌手身份外,近年更多專注在電影,當他知道對方為電影增肥變肥佬,之後再去跑馬拉松減肥,就知小齊是位很認真的人,「同埋佢都冇咩唔同,個人好坦率,覺得佢係一個好有可塑性嘅演員,因為佢外表好Man,但其實佢嘅內心係一個大好人,仲識去玩放鬆自己。」

可一不可再的挑戰
家輝與小齊在電影路上,各自作出不同的突破,家輝13年在《激戰》的爆肌Look令人眼前一亮,無不佩服他的毅力,而小齊去年為電影《跑馬》增肥40多磅,化身「肥大叔」,搞到「三高」都在所不計。小齊坦言自己增肥拍戲,其實是受家輝所啟發,「嗰陣我知道佢為部戲操到好勁,就覺得呢個係演員應該做嘅嘢,我要努力去追求。咁嗰套戲要食肥,就諗唔操肌,食肥都可以試吓,點知原來要肥都唔輕鬆,我日日食到胃酸倒流,仲有啲三高啊!」
對於未來的日子兩人會否再作類似的挑戰?家輝即笑言:「不如我哋講第二個話題喇,仲點整多劑啊大佬!」之後他道出當年何以有如此動力變身爆肌男,「我細個嘅時候就睇許冠傑,當樂壇開始起變化,步入張國榮與譚詠麟年代時,佢就繼續拍戲,記得佢拍《最佳拍檔》嘅時候,操到自己好大隻,我嗰時候就諗有冇搞錯呀?30幾歲人,仲可以咁樣,有啲肌肉咁樣,邊有可能啊!30幾歲阿伯嚟㗎嘛。到我自己有個Project 時,我覺得我需要咁做嘅時候,嗰陣我都40幾歲喇,當時自己嘅啟發係,只要你郁就得,冇話遲唔遲!」不過現時,家輝直指若要其身體再負荷一次劇變,他坦言:「咁我覺得對自己係好傷元氣,我諗我唔會考慮囉。」隨即問身旁的小齊:「你呢?」小齊妙回:「我諗我一次就夠喇,因為真係太辛苦喇。」

;