娛樂

2019年11月17日

2017/06/30 (週五) 12:00上午

星情飯局 感動生命 衛詩

認識衛蘭在先,才認識衛詩(Jill)。這對姐妹的確很像,樣子、聲線⋯⋯而我覺得笑聲更似,都是給大家爽朗和愉快的感覺。
今次和衛詩吃飯,她「苦情」地傾訴:「你快啲食多啲啦,你鍾唔鍾意食澱粉質㗎,我好鍾意食㗎,但要上鏡好睇,我依家要節食啊!」扁扁嘴的衛詩,多了一份小女生的可愛。

撰文:Carrie Yip(carrieyip@msn.com)|攝影:David Lee@chinapixel
化妝:Marsha@Kong Chung Ping Make Up School |髮型:Carmen Ngai@Hair
服裝提供:WHISTLES@rue_madame|美術:Ronnie Cheung

重視父親
衛詩坦白說:「我比較鍾意食嘢,平時喺屋企多數煮牛扒,通常菜同肉為主,但依家想外形靚啲,節食緊,不過今次同你飯局,又可以去朋友嘅餐廳T’s Factory放肆咁食多少少,好開心!」
2015年重返樂壇,衛詩由慢慢的重新適應,到目前漸加快腳步,去年和姐姐衛蘭等人組成Dear John女子組合,成績不錯,「呢個係我其中一個夢想,細個時已經好鍾意聽男仔Band嘅音樂,Dear John唔係重返樂壇嘅主要Project,但大家啱傾、好開心,女仔Band亦畀到大家新鮮感,我哋一齊去Pick Up一啲樂器喺台上表演,係一個好體驗。」衛詩喜歡現場表演音樂,皆因父親是一個音樂人,自小受感染。「細個嗰時,阿媽返咗韓國同日本,我同家姐跟爸爸生活。爸爸係一個音樂人,我哋成日就喺酒店酒廊睇到好多現場唱歌嘅表演。我嘅音樂,好多係受爸爸感染,佢聽埋一啲四、五十年代嘅歌,又鍾意電子結他⋯⋯有爸爸,我先至可以喺細個時,就有啲喺台上表演嘅機會,呢啲經驗亦令到我減低怯場。」衛詩非常敬愛他的父親,強調父親節和父親生日是每年的重要日子,「喺父親節一家人一定要聚埋一齊慶祝,大家傾偈、分享、見面;爸爸生日,我同家姐會親手做生日蛋糕,一家人唱歌、彈琴玩吓音樂,就好似小型音樂會。」衛詩形容和家人相聚的溫馨,我Feel到幸福滿瀉!
用心去唱
還記得曾有報道指衛詩出道時妒忌姊姊衛蘭的成績,「我同家姐好感情,我覺得家姐唱嘅情歌真係好入心,我自己都好鍾意,點會妒忌呢?」衛詩答得爽而快。
每一個人是獨立個體,有所不同;做音樂,定會有分別的。「我好鍾意跳舞,出道嗰陣都係以快歌為主,其實跳舞都係一種減壓嘅方式,好想畀多啲正能量大家!我依家會喺教會服務、做好多分享,希望能夠令到大家正面咁去面對自己嘅生活同埋生命。每一個人都會經歷過好多唔同嘅人生階段,其實當不同Timing,就有唔同嘅曲風出現。未必一定要做K歌先會流行,有一啲歌手嘅技巧未必好好,但點解仲咁有吸引力同感染力呢?就係有個心去唱好首歌畀大家!」衛詩的新作品《刺青》、《被滿足的愛》、《感情需要》、《I can see》等等,風格和感覺都完全不一樣,是衛詩希望以自己嘅生活經驗,透過音樂去幫到一些人。「但我由細到大講開英文,朋友圈亦都多數係以英文溝通,講廣東話同國語係有難度!不過依家我會畀多啲心機去學廣東話同埋國語,方便日後同大家溝通。」有志者,事竟成,肯學,就掂!

T’s Factory
地址:觀塘敬業街65-67號
敬運工業大廈2樓B室
電話:5380 9145
平均消費:約$250 /位
泊車:利華科技中心停車場
營業時間:11:00-22:00

星情飯局
主持 Carrie葉嘉儀
傳媒人。喜歡「吃」,皆因非只飽足五臟,更可透看人情。

;