娛樂

2019年8月19日

2019/03/15 (週五) 12:00上午

星情飯局 愈戰 愈強 楊思琦

雖則話大樹好遮蔭,但離開無綫多年的楊思琦,戰鬥力依然強勁!她個人微博的粉絲過百萬,密密在國內商演,估計賺不少!
繼性感寫真之後,楊思琦最近推出了新歌⋯⋯工作之餘,又要湊女,仍不停為自己夢想努力,一個實現之後又一個,楊思琦的小宇宙,絕不能睇少!

撰文:Carrie Yip (carrieyip@msn.com) 攝影:Rico 髮型:Chris Cheng@ILcolpo

適應半漂生活
一直很多人都會問楊思琦的感情生活,但這幾年她工作忙碌,那有時間拍拖!
「拍拖呢樣嘢,我唔會急,同埋唔可以強求,緣分嚟到就到啦!」緣分這回事,往往話來就來、說散就散,確不可強求。頻頻撲撲的楊思琦神采飛揚,該是來自工作的滿足感!「我算係第一批去大陸做嘢嘅香港演員,國內市場好大,製作上都有啲唔同嘅,當年我用咗好短嘅時間適應咗,全靠喺TVB嗰陣時嘅訓練。喺國內做嘢咁耐,都畀咗好多嘅滿足感我,亦有好多難忘事,最記得一次我係飾演軍人,有打仗嘅場面,荷槍實彈,又要應付武打,啲爆炸場面就喺身邊發生,自己日日好似喺度逃亡咁,晚晚都捽藥酒,哈哈,真係好搏!」
目前,楊思琦平均每個星期有3至4日在國內工作,是「半漂生活」,而最近就忙於新歌《愛的森林》的宣傳。楊思琦說:「呢首歌準備咗6個月,我參與咗好多,揀音樂啦,詞都往往來來幾次,將我自己一啲感情嘅睇法都擺晒入去裏面,依家出嚟嘅效果,自己好鍾意呀。講真出一首歌唔會點賺到錢,只係一直以來都鍾意唱歌,好開心推出之後反應都幾好,有個粉絲同我講:『以前都鍾意你唱《星夢美少女》(兒歌),今次呢首新歌都好好聽!』香港嘅宣傳已經差唔多,跟住就返國內繼續宣傳《愛的森林》。」

不是怪獸家長
很久之前已經唱兒歌,楊思琦也曾唱過電視劇《人生馬戲團》的主題曲《只需要你》,笑言其女兒Krystal更是她的頭號粉絲。
「囡囡同佢啲朋友講我係一個Singer,佢完全唔知我係Miss Hong Kong,佢係最近喺網上見到我參選香港小姐條片先知道,知道後仲即刻嚟恭喜我,幾搞笑!」楊思琦疼愛女兒,視如心肝寶貝,就算日常工作多忙,也會親自跟進女兒的功課和學習進度。「可能以前自己讀師範(現為香港教育大學)囉,就算收工返嚟好眼瞓,我都會去跟吓佢啲功課,日常都會同佢多啲親子活動,有時一啲工作,我都會帶埋佢去,等佢感受到我嘅工作環境,同埋我份工係做啲咩嘅。唔使工作,一齊去旅行、行吓街、食吓飯,好似今餐嘅咕嚕肉、豉油雞,我同囡囡都鍾意食,送飯唔錯!」
師範畢業的楊思琦,並不是怪獸家長,更有一些管教貼士分享,「我讀過吓兒童心理學,其實,教細路仔可以話好簡單、亦可以話好複雜,同其他家長分享嘅係:一定要指令清晰明確、賞罰分明!譬如食飯,對於頑皮坐唔定嘅小朋友,畀一個時間佢哋,話明喺幾點前或者幾多分鐘後要食完,小朋友自然會更容易做得到。」「指令清晰明確、賞罰分明」,為老闆或管理層者,也適用!

品玥廳
地址:荔枝角長裕街10號地下
電話:2336 6776
平均消費:約$200/位
泊車:億京廣場停車場
營業時間:11:30-22:00

主持
Carrie葉嘉儀
傳媒人。喜歡「吃」,皆因非只飽足五臟,更可透看人情。

;