財經

2019年10月18日

2019/09/20 (週五) 12:00上午

旅客大跌五成 鄧添穩反擴充

有人話近期嘅社會風波令香港經濟差咗,但早兩日Candy去逛大館時,遇見喺旅遊業服務咗24年嘅鴨靈號商店老闆鄧添穩,就問問佢點睇而家香港嘅情況。佢認為每個行業都有自己嘅Cycle,而呢段時間即使無發生近期事件,仍然係香港旅遊業嘅淡季,「除咗日本同泰國之外,遊客好少一年去幾次。而香港嘅熱潮啱啱過咗,稍後會復甦。」
問到相比去年同季旅遊數字,佢就話近期旅客跌咗五成以上,「近兩三年係旅遊業Cycle 嘅低潮,亞洲客少咗,過往大家可能唔覺,因為多咗內地客嚟港,令整體數字睇落唔係太大分別,但近期內地客明顯下調,大家更易發現來港旅客少咗。」
不過,即使喺低潮期,鄧依然無懼開新店,佢話做生意睇長線,對香港旅遊業前景好有信心,仲話調節心態好重要,「要相信冬天過後,好快就到春天,當人有希望,才會前進。」

K11 MUESA名牌爭住租?
新世界發展(017)前日宣布,獲全球房地產可持續標準(GRESB)頒發可持續發展標準最高嘅五星級別,並獲選為具多元化業務的東亞上市企業首名。副主席鄭志剛話,可持續發展係全球大趨勢,對現代生活文化極為重要。
其實,佢旗下嘅新地標“K11 MUSEA”早前正式開幕,以體驗式購物藝術館為主打,亦喺多方面逐步實現呢個願景,更榮獲美國《領先能源與環境設計》(LEED)及香港《綠建環評》(BEAM Plus)金級預認證。商場樓高10層,共有70多個國際及本地特色品牌爭相進駐,好多係首間全球或亞洲旗艦店和概念店,例如英女王最愛嘅Fortnum & Mason、Veilance、CHARLOTTE TILBURY、Mackage、TUMI、Dior等,結合創新、藝術、設計同技術,突破傳統零售商店框框。

中環公關
Candy,金融界公關,
喜歡發掘商界趣事秘聞。

;