娛樂

2019年9月17日

2019/09/11 (週三) 12:00上午

撐抗爭疑致拆夥 徐天佑:No more Shine

自反修訂《逃犯條例》開始,不少藝人於社交網發表意見,部分人更冒着被打壓的風險支持「反送中」,好似組合Shine成員徐天佑則表明與抗爭者齊上齊落,惟前晚卻爆出一句“No more Shine”,疑受壓被迫與隊友黃又南拆夥!

最近徐天佑多次於社交網出Po,支持敢於抗爭的香港人,前晚他再於facebook(fb)發聲明:「我永遠與香港人同在,不割蓆、不篤灰,齊上齊落,我們不怕。」結果獲大批粉絲派Like,連杜汶澤都讚他型,不過有網友則問:「Shine是否都齊上齊落?」豈料天佑回覆:“No more Shine.”旋即惹來不少揣測,有網民問:「咁多年感情真係可以因為唔同色就Game Over?」亦有質疑隊友黃又南擔心被拖累。

認四面受敵
未幾天佑再開Po:「壞人當道。我係一個好人,如果我瀨嘢,希望你會相信我係一個好人。」最後更留下「暫別」二字,令拆夥傳聞更似層層。其實早於7月,他已透露:「有『人』同我講『不如你唔好再講嘢啦』,我明白……但可以嗎?低頭嗎?」疑被勸封口。對此,天佑回覆傳媒:「Sorry,四面受敵。 I can’t say anything.」又直言好大壓力,一言難盡。其經理人錢小姐則否認Shine拆夥:「佢哋感情冇問題,各自拍戲,所以先冇時間一齊工作,如果之後有演唱會,都可以再一齊。」
王喜斥破壞法治
另外,對於休班警獲發伸縮警棍,供他們隨時執法,曾任職皇家香港警察的王喜昨日於fb留言譏諷:「你哋係想『休班持械』而唔係『休班執法』!有咁熱愛『執法』咪唔好『休班』囉!」更鬧爆此舉煽誘他人冒警或休班時犯法,破壞法治!

;