娛樂

2019年9月21日

2019/07/12 (週五) 12:00上午

廚神上身 黎諾懿

這幾晚看黎諾懿主持的《懿想得到》,真是有點意想不到,連牛脷酥、蛋包飯等等,也煮得有板有眼,雖則曾嘗過黎諾㦤的廚藝,但目前似乎他的廚藝又進步了。
「節目裏面,有好多即場煮嘅菜式,只係學咗幾個鐘就去煮!」黎諾懿果然廚神上身。

撰文:Carrie Yip (carrieyip@msn.com)
攝影:Rico

絕不是得個樣
首集《懿想得到》,黎諾懿親手做了牛脷酥、燈影煎堆,鄭伊健吃得津津有味,不少嘴饞的觀眾,也想一試。
《星情飯局》黎諾懿帶我到愛民邨熟食亭的「明利」,「整牛脷酥畀伊健(鄭伊健)食,係由零開始,專登嚟跟明利老闆東哥學咗兩個鐘㗎!」明利是地道的愛心粥店,老闆東哥心地好,不時免費派粥給長者。「好欣賞東哥份人,有心去照顧啲老人家;仲有呢度啲牛脷酥、油炸鬼、煎堆整得好好,唔油㗎;啲粥冇加味精、煮得又夠綿!」黎諾懿欣賞東哥,東哥亦讚他「學嘢快上手」,絕不是得個樣!
「係首次用自己個名嘅節目,一定想做好啲,所以好大壓力!節目裏面整咗好多唔同嘅嘢食,如果講成功感,會係同阿田(田蕊妮)嗰集嘅蛋包飯;講有意思嘅,係中式嘅傳統食物,譬如牛脷酥。呢啲人手做嘅地道嘢食,代表到香港,好有昔日情懷,賣得唔係好貴,但有份人情味。好想將呢啲傳統食物承傳落去,如果我可以學識晒,會好有滿足感。」

一起感受世界
對於傳統食物,黎諾懿特別珍愛。其實,黎諾懿也是一個很傳統的男人,每當工作忙完後,他必定會多陪家人。
「太太平日湊小春雞(他兒子的乳名),好花心機同體力,所以,我唔使開工,就親自去街市揀啲靚食材,入廚整餐好畀佢食、慰勞一下,整過嘅炒蟹、大蝦、蒸魚等海鮮,太太都好滿意,有啲好朋友嚟食飯,食過我嘅手勢都覺得唔錯!但因為小春雞早瞓,同太太都少咗出街食飯,有時等佢瞓咗,先至出去會啲朋友,冇特定去咩餐廳,大牌檔都會去㗎,最緊要好食同大家聚下!」
屋邨長大的黎諾懿更憶述:「依家煮一般家常菜真係冇乜難度!
細個時,阿哥買餸、我煮飯,唔講究㗎,快啲食飽,咪快啲玩,幾簡單開心呀!」難怪黎諾懿常帶小春雞四處玩,他說和兒子一起感受世界,讓兒子快樂成長,是目前的重任。

明利油器粥品
地址:何文田愛民村熟食亭
電話:不設查詢
平均消費:約$40/位
泊車:愛民邨停車場
營業時間:07:00-24:00 (逢星期一休息)

;