娛樂

2019年8月25日

2019/05/17 (週五) 12:24上午

堅守消失的味道 李美琪

「我覺得打卡嘅年代係影響咗飲食行業。好可悲,可能碗麵包裝過,價錢賣得比依家高,你都會好願意去食,但其實碗麵曾經好簡單、平實咁擺喺你面前又唔食,只可以講好無奈……」李美琪慨嘆。
確實,這幾年不少「靚裝」及主題餐廳冒出,經營多年的老店卻相繼倒閉,不單止因捱不住貴租,還多得一班「分享症」患者,比起食物本身的味道,他們似乎更追求視覺上的衝擊!身為「榮記香港仔牛什魚蛋粉」太子女的李美琪,雖然也面對現實,覺得粉麵店終須轉型,但她堅持秉承爸爸對食的執着,「如果自己都唔夠膽食餐廳嘅嘢,又點說服其他人呢?所以爸爸每日都會試味,我對佢嘅產品都好有信心,將來我開餐廳都會注入爸爸嘅味道,承傳落去。」

撰文:黎寶倫|攝影:ChaseK

為何人類總要重複犯錯?學周星馳於電影《西遊記大結局之仙履奇緣》話齋:「曾經有一份至真嘅愛情擺喺我面前,但我冇去珍惜,到冇咗嘅時候先至後悔莫及。」
這幾年,不少老字號餐廳相繼結業,除了因不敵貴租、生意差外,無人繼承亦是致死原因之一,像是元朗新食街──又新街那樣,1年來已有至少4間食肆倒閉,在此經營了17年的港式粉麵店「榮記香港仔牛什魚蛋粉」卻仍然屹立不倒,全賴老闆李先生一直堅持,惟幼女李美琪(Monnie)認為爸爸捱足多年,是時候好好享受人生。

養活一家
回憶當初,任職餐廳大廚多年的李爸爸,早年跟友人合資開食肆,最終基於拍檔私人理由,蝕錢離場。事隔多年後李爸爸另起爐灶,於元朗開了現時的「榮記」,一家5口便齊心協力打理好這盤生意,由爸爸做大廚、媽媽做樓面,3名子女則輪流落舖幫手,漸漸這裏已變成他們的家,「呢度養大我哋3兄妹,所以佢比屋企更屋企,屋企就好似我哋嘅酒店,即係返去瞓覺、沖涼,但餐廳係想見爸爸、媽媽就一定會見到嘅地方,大時大節或家庭聚餐我哋都會喺舖頭搞,所以呢度係一個好窩心嘅地方。」Monnie說。

不過,眼見年屆60的爸爸幾乎全年無休,每朝8點做到凌晨3點,做囡囡的也很心痛,「我勸過爸爸咁辛苦,不如放棄,但佢話做得好開心,因為佢唔做嘅話,啲客人話唔知去邊度食嘢。其實爸爸都好開心聽到人哋讚佢啲食物,已經唔係講緊賺到幾多錢,而係想留住一份人情味,同埋佢覺得好少人願意咁堅持去煮一種味道,所以想喺自己仲做到嘅時候繼續做。」

勸父退休
既然如此,倒不如3兄妹直接繼承父業,讓李爸爸安享晚年吧!未知哥哥和家姐有何打算,但Monnie明言不會接手,「講真我一個女仔,無論幾咁硬朗都做唔到佢做到嘅所有嘢,所以我好佩服爸爸。其實之前我有問爸爸『如果我今年搵到人頂手,你願唔願意放手?』佢都話唔想呢樣嘢失傳,如果有人有心想做,佢亦唔介意親自去教嗰個人,但搵唔到嘅話,佢都應承最多做多兩年,係可惜嘅,但真係冇辦法,就算幾唔捨得都要放手。」
況且時代變遷,她認為現時飲食業的經營模式亦有所不同,「你叫我做舊式粉麵檔,我都未必會,因為我覺得係個時代淘汰咗佢,如果我要做碗粉,可能連環境、裝飾、餐具都要改變到好迎合現代人需要,即係可能依家興打卡,啲人鍾意靚,如果你啲嘢食、飲品好靚,一杯嘢賣50蚊都有人買,但我杯豆漿賣10蚊都嫌貴,變咗唔係品質唔好,係你唔願意去欣賞呢件事,咁點樣Keep到呢樣嘢呢?就要搵方法去轉型。」

承傳手藝
現今社會似乎有點失衡,許多人願意花一大筆錢食環境、食名氣、食潮流,但對於傳統、貼地的美食卻食得極之孤寒,於是,一些食肆選擇監平監賤鬥快「死」,荃灣兩、三蚊豆腐花便是最佳例子,「打卡嘅年代係影響咗呢個行業,我真係見過一個客覺得一碗熱辣辣、用10幾、20個鐘去準備嘅粉賣30幾蚊係唔值,而你會心甘情願排隊去買1杯用幾分鐘就整到嘅50蚊飲品,但冇辦法,大家對飲食需求唔同咗。」
若要承傳這份味道下去,轉型是必然的。目標開餐廳的Monnie又忽發奇想,「我有諗過Fusion,邊個話Cafe一定要賣咖啡?都可以賣港式咖啡、牛腩!」即是以靚景及餐具去包裝,最緊要是學識爸爸的手藝,那麼至今吸收了多少功力呢?「差好遠!希望有五成啦!爸爸教過我炒辣椒油、點炆牛腩同牛雜,仲有雲吞、水餃嘅餡,湯料、滷水汁都有學過,但做飲食日日都面對不同情況,所以一定要長時間不停練,累積咗經驗先知點處理,呢個學問係一世都學唔完。」她說。

榮記香港仔牛什魚蛋粉
地址:元朗又新街65號運興樓地下3號舖
電話:3523 1883
營業時間:星期一至日11:00 – 02:00

;