財經

2019年7月24日

2019/06/13 (週四) 12:00上午

中環八羽茶室 金鐘新股PC撞正催淚彈 開記招場地 愈危愈安全?

因為政府堅持修訂《逃犯條例》引發嘅民怨,噚日終於大爆發,最終更釀成全面衝突,導致多人流血收場,好幾個原定召開嘅記者會,亦臨時宣布取消。不過最特別嘅係,有兩單喺九龍嘅新盤記招,話因為交通受影響而冇開到,反而喺正「衝突重災區」金鐘附近嘅記招呢,就能夠如期舉行喎,搞到記者朋友都不明所以!
資深地產版採主強哥話,噚日朝早一起身,就先後收到公關朋友通知,有兩個分別喺ICC同埋尖沙咀港威大廈舉行嘅新盤記者會,因為有多條道路封閉,令公共交通受影響而取消。佢就覺得有啲奇怪喇,因為就算自己住港島,要去九龍站或者尖沙咀,搭港鐵應該完全冇受阻吖!不過既然取消咗,佢就晏少少返工,睇直播留意最新局勢啦!
不過記者妹Chole就話,佢今日接到要去嘅一單新股上市記者會,係下晝5點喺金鐘香格里拉酒店舉行,由於公關冇話到取消,所以佢準時出席,結果亦順利舉辦,冇任何阻滯。不過,佢話剛到達金鐘嘅時候, 原來警察啱啱施放完大量催淚彈清場,所以覺得港鐵站內氣氛緊張,仲彷彿聞到一股催淚氣味,感覺有啲不安!資深公關Mary姐就「戴頭盔」,話開唔開記者會都唔到自己控制,雖然佢哋可以畀意見個客,但如果對方覺得記者會好重要,都要跟隨佢嘅最終決定!始終財經公關呢行愈嚟愈難做,顧客大個天吖嘛!

「中環八羽茶室」匯集一眾擅長收風的各界精英,與各位八盡財金界秘聞及新鮮滾熱辣話題!

;