財經

2019年10月18日

2019/10/10 (週四) 12:08上午

中環八羽茶室 金屬股變身改賺家長錢

喺Google輸入馮志堅(堅哥),最先搵到嘅搜尋結果,就係馮志堅及奶茶,唔識堅哥嘅後生仔女,真係隨時當咗佢係年長創業嘅勵志故事。經常喺八羽茶室吹水嘅張總話,佢老友堅哥作為金銀業貿易場永遠名譽會長,最近獲上市公司港銀控股(8162)邀請加入董事會,但到底呢間公司有咩吸力,可以吸引堅哥出山?
港銀控股係香港知名綜合金屬交易商及加工商,主要喺香港從事白銀、黃金及錫等金屬交易,以及白銀產品加工業務。不過有趣嘅係,公司早排突然宣布開展國內教育業務,透過間接附屬公司向四川港銀雅匯教育管理增資 455萬元人民幣,開展學校管理服務。
張總認為,內地人消費力愈來愈強,自然希望下一代可以享受優質教育,而港銀雅匯管理嘅學校以「新格林」為品牌,札根四川成都,開設幼稚園、小學、中學及技能培訓學校,其風格着重學生藝術培養。或者因為呢嚿肥豬肉,令堅哥睇上咗港銀,掌握教育領域嘅「前途」啦。
已經係兩子之母嘅公關大姐Susan話,去年就有一份報告指出,國內家長喺教育方面花費豪爽,而且隨住子女逐步成長,教育支出金額會持續增加,而且81%受訪家長都有為子女報讀課外興趣班。Susan認為,女人錢(化妝品、首飾)同家長錢(供書教學)一向最易賺,係千古不變定律,所以港銀喺呢個時候轉型,都算係一個明智抉擇喎。

「中環八羽茶室」匯集一眾擅長收風的各界精英,與各位八盡財金界秘聞及新鮮滾熱辣話題!

;