財經

2019年12月10日

2019/07/16 (週二) 12:00上午

中環八羽茶室 太古拒警擅闖 新城市疑「引路」 港資商場企示威者對面?

喺上星期日,沙田區嘅遊行再次演變成警民衝突,示威者同警方對峙嘅位置,本來係戶外大馬路,但喺警方步步進逼下,竟然移師到附近嘅旗艦商場新城市廣場。八羽茶室一班茶客噚日熱烈討論嘅話題,除咗警方喺商場圍堵市民嘅手法外,亦驚嘆點解新地(016)嘅「商場」變「戰場」,搞到連食飯買嘢嘅市民都嚇餐飽!

當晚一家大細喺新城市食飯嘅秘書Mable話,食飽飯無耐,佢哋由8樓落到3樓中庭附近,就見到示威者驚惶失措喺商場狂奔,隨後有大批防暴警察揮棍趕至,嚇到老人家同小朋友面都青埋,好彩佢哋企埋角落頭,先至冇畀人撞親,但都等咗好耐先走到。Mable事後睇返街坊轉發嘅片段,喺大批防暴警察進駐商場嘅時候,前面清楚見到有兩名身穿制服嘅職員揚手引路;不過新城市廣場就「割」,話從來冇報警,亦冇帶警察入場,令佢匪夷所思!

「追究警方硬闖證清白」
熱衷參與社運嘅公關Damon聽完嬲到拍枱,佢話喺金鐘「6.12衝突」嘅清場行動中,大批示威者湧入太古(019)旗下太古廣場避開「速龍」攻擊,但太古廣場保安並無讓警方進入,當時未能入內嘅警員仲鬧示威者做「自由X」而出晒名!相反,新城市職員除咗疑似「警方來了我帶路」外,仲有網民聲稱,喺警方進場前5分鐘,懷疑有職員攔住商場往地下巴士總站嘅電梯出口,咁當時沙田港鐵站已經被防暴警察封住,佢又唔畀人用另一個途徑走,咁係咪協助圍堵先?Damon仲講到,網上流傳警方一早已經同新城市廣場聯絡,所以管理處疑似事先配合,提早拎走中庭嗰層嘅垃圾桶同排隊拉筒!佢再引述連登仔消息,話噚日喺新城市廣場嘅控制室,已經有大批CID翻睇閉路電視片段搜證,不禁驚嘆「使唔使配合成咁」?佢無奈咁講,兩個商場對待示威者嘅態度,不禁令人質疑,到底老牌英資同親建制港資,對待示威者係咪真係咁差天共地?
一向「搵錢至上」、聲稱中立嘅張總即刻安撫Damon,佢話新城市已經出咗聲明,話事前唔知道警方會入商場拉人,亦唔知港鐵一度不停沙田站嘅安排,又重申商場三樓通往沙田港鐵站入口嘅通道,係24小時公共通道,必須開放予所有人士喎。
不過張總又話,有人質疑新地完美配合警方亦無可避免,因為新地同警方關係密切,例如佢哋嘅市務總監楊祖賜,同時係香港輔警總監;至於旗下載通(062)亦請咗警務處前處長曾偉雄、「四點鐘許Sir」許鎮德等人做高層㖭。
張總最後話,想拆解呢場「關公災難」好簡單,就係睇下話事先「唔知情」嘅新地,會唔會追究警方責任,告佢哋硬闖私人地方、禁錮客人同商戶呢?如果冇,咁係咪默認容許警方入內「開戰」,罔顧客人同租戶安全呢?

「中環八羽茶室」匯集一眾擅長收風的各界精英,與各位八盡財金界秘聞及新鮮滾熱辣話題!

;