財經

2019年12月10日

2019/07/22 (週一) 12:04上午

中環八羽茶室 傳上市公司出招 「勉勵」員工「護香港」 集會唔派錢改放半天假?

《逃犯引渡條例》修訂爭議持續,雖然特首林鄭月娥宣布條例已經「壽終正寢」,但佢「撤回」二字好似魔咒咁,無論幾多人上街佢都唔願意講,亦拒絕成立獨立調查委員會撤查事件,因此數以十萬計市民噚日再次參與大型遊行,堅持爭取五大訴求。那邊廂,建制派亦不敢怠慢,已經喺上星期六「搶閘」、率先搞咗個「守護香港集會」,邀請多名官員、前警務人員、建制派議員及商會代表等出席,大會聲稱有31.6萬人出席集會。據聞背後除咗有唔少中央支持嘅同鄉會「吹雞」之外,市傳仲有啲上市公司呼籲員工出席集會,參加者仲可以獲得補假半日㖭!

「八卦至上」嘅企管專家張總,收到朋友Send嚟嘅Cap圖,內容係某香港著名上市貿易公司一封內部電郵,呼籲同事報名參加集會,聲稱方便集中員工一同出席。另外張總亦都收到朋友轉寄嘅WhatsApp信息,係嚟自一間香港著名珠寶鐘錶零售商,發送信息嗰位高層聲稱自己身處歐洲,未能親身到場支持,但呼籲各位經理同主管出席,仲講到明「凡參加者,公司給予補假半天,希望大家能參加並呼籲親友們一起。」
呼籲一家大細參與
年輕財俊Edward聽到就大大聲笑出嚟,話呢間珠寶公司阿頭都幾醒,自己喺歐洲風流快活,但就想啲員工叫埋一家大細親朋戚友,幫佢提供十幾廿個人頭,話晒嗰日出去集會要淋雨,萬一淋病細路哥就唔好啦,仲要一日假都補唔足,果然好有生意頭腦。
一向數口甚精嘅Edward仲話,呢個喺添馬公園搞嘅「守護香港集會」,竟然可以聲稱有31.6萬人參加,都可算係一個奇迹,因為添馬公園面積只有1.7萬平方米,而且警方喺2015年亦都話過,添馬公園最大容量為1.7萬人(但今次佢哋自己都竟然話有10.5萬人參與,莫非添馬公園容量喺四年間,忽然變大咗6倍?),如果真係有31.6萬人集會,咁咪每平方米企成廿個人?咁應該只有疊羅漢向上發展,先有可能做到喇!

「中環八羽茶室」匯集一眾擅長收風的各界精英,與各位八盡財金界秘聞及新鮮滾熱辣話題!

;