娛樂

2019年7月20日

2019/07/12 (週五) 12:00上午

不只溫柔 溫碧霞

或許是成長經歷所致,小時候家境清貧的溫碧霞已非常硬朗,立志將來靠自己走出困局。雖說早年遇上真命天子何祖光,使其頓成「現代版灰姑娘」,但她卻沒有放棄自己的事業,繼續拍劇、電影、出寫真,皆因溫碧霞認為做女人不可「冇咗另一半唔得」,必須建立自己的事業,同時Keep住內外兼備,才能留得住男人心。

撰文:黎寶倫、攝影:fr3d3r1ckl4u、髮型:Daniel Chang @hair Corner n mini g Salon、化妝:Khaki Yan、場地:HEXA六公館

繼5年前推出慈善寫真後,即將踏入53歲的溫碧霞(Irene)於今個夏日再出第3本寫真集《海潮》,是次除了以靚相為主的香港版外,9月又會推出自傳形式的內地版,與影迷分享自己的心路歷程。
寫真大解放
為配合主題,早前她更特意飛赴塞班島取景,當中超過20個造型,展示了其狂野、型格、居家悠閒等不同面貌。而數到最「吸睛」的,莫過於半裸「瞓」身晒背、露波邊的一張!問丈夫可有微言?她笑謂:「咁多年咯,佢都慣咗喇。我覺得自由好緊要,我唔係好管佢,佢又唔係好管我,大家都互相畀好多空間對方,所以事前都唔使畀佢過目。」
對於性感,Irene亦有自己一番見解,「我覺得性感係一種感覺,有時唔好太過刻意,美感最重要,而唔係暴露,即係有少少誘惑、若隱若現,令人有遐想嘅。」可是,近年不少嫩模寫真意識都很大膽,她則認為藝人不應一味靠性感博出位,「最緊要充實自己嘅內在,因為觀眾唔淨係睇外表,外在嘅美亦都好短暫,反而內在美先最持久。」就如她多年來都落力演好每一齣戲。
剛強難馴服
鏡頭前,Irene總予人柔情似水的形象,但原來私下卻十分男仔頭,尤其入行前絕不愛影相及扮靚。究竟是甚麼令她逐漸滲出女人味呢?除了入行後迫使Irene更注重外表外,她說:「愛情都好大魔力,會令一個人愈變愈靚,愛情對我嚟講都好緊要。」而唯一不變的,大概是其剛強的性格吧,「如果我要做一樣嘢,係冇人可以改變到我,我係好需要自由同好Tough。」
00年,Irene下嫁國民黨元老何應欽後人何祖光,雖然另一半家境顯赫,但她卻未有印印腳做少奶奶,「每個人都係個體,唔可以依賴晒對方,一定要有番自己嘅睇法、理想,咁先會成為一個真正嘅你。我都唔會話婚後靠佢唔使做,咁多年嚟都盡可能靠自己,老公都覺得我好硬淨、好難馴服,因為我永遠都有自己諗法,佢唔可以叫我做啲咩,我都唔會叫佢做啲咩。」
傳授禦夫術
說到至今仍為事業繼續打拼,未知老公可有埋怨Irene分配太多時間於工作?她表示婚後已減產,現時只接喜歡的Job,「我覺得都要體諒對方,但唔係唔做,一定要做,因為呢個係我最開心嘅嘢,演戲係我最大嘅滿足感。」
不過,記得前年夫婦倆一度鬧婚變,有傳因男方嫌太太常不在港,各有各忙令感情變淡。當時任性地離家出走兩個月的Irene則解釋:「嗰時突然之間好想做番女,好想有番嗰種自由自在、無拘無束嘅感覺,但好快又冇咗。經歷嗰次後,我發覺自己真係好愛佢,亦知道佢好愛我,所以會更加珍惜佢,依家我哋嘅感情更加好,可能係因為我有Challenge佢,畀佢知道我唔係永遠都喺佢身邊。」做女人,不單止要間中給予另一半危機意識,Irene又認為:「外表同內在都好緊要,對住佢,我都有好女仔、溫柔一面。」

;