娛樂

2019年10月20日

2019/09/20 (週五) 12:00上午

不一樣的媽媽 陳慧珊

漫長的暑假終於結束,今年的開學日氣氛很不一樣……
經歷一場又一場的「抗爭」洗禮後,學生們都火速成長,亦有人因為政見不同而與家人反目。對已為人父母的陳慧珊與丈夫鍾家鴻來說,一味鬧子女是沒有用的,最錯的做法就是放棄,「佢哋依家有咁激烈嘅反應,係咪因為睇唔到前景呢?定係誤判咗現時嘅情況,令佢哋放棄呢?咁你叫佢廢青咪令佢更加唔舒服囉!」他們說。
除了學教、家教外,陳慧珊認為終身「自教」也很重要,不論子女或父母都要學識自省,教育亦應該因人而異。不妨一看其監製的新節目《放學後》吧,或許你會得到些啟發!

多得行政長官林鄭月娥一句“They have no stake in the society”,把香港的年輕一代標籤為「廢青」,令這一詞頓成老一輩的「潮語」,人人琅琅上口。所謂「廢青」,俗指讀書不成或不工作,終日沉迷玩樂的年輕人。不過,究竟何謂「成功」及「廢」呢?難道非名牌大學畢業就注定是失敗的一群嗎?顯然陳慧珊(Flora)絕不認同:「教育唔淨係喺課室裏面,係喺日常生活裏面,每一刻都可以學習,例如從別人身上學習,唔使一定要喺學校裏面,所以我唔同意咩叫『廢青』囉!就算有啲教授讀到好高級,有時佢哋嘅一啲行為都唔啱,我成日都講“Do the right thing at the right time, to the right people in a right manner.”唔係話你讀好多書就一定啱晒,而係要睇個人。」

教育使命
06年,Flora於美國秘嫁經理人鍾家鴻,翌年誕下一女Mira,此後便大幅減產,專心相夫教女。至早年,她為囡囡決心重返校園進修,目前則於港大修讀教育博士,「最初想做稱職媽媽,讀咗先發現我原來可以利用自己嘅經驗、睇法去感染人,因為我之前做啲Talks,啲鬼婆都唔識我,當我講完自己嘅故事,佢哋對眼由冇興趣到『我明你講咩喇』,睇到呢啲反應時,就會逐漸覺得我嘅Life係可以Be useful to people,咁對熟悉我嘅香港人嚟講,我更加可以利用演員身份去影響人哋。」
於是3年前,Flora與丈夫開始製作以教育為題材的節目《放學後》,透過來自50至90年代、不同背景、界別及教育程度的嘉賓,包括曾俊華、吳鎮宇、宣萱等,帶出除了學教、家教外,最緊要終身自教,即是自我覺醒後提升本我,從而成就自己,「我哋都有撩鎮宇講『你唔係香港電影金像獎影帝喎』,呢啲唔係揭發啲咩,係想帶出有啲嘢你係要接受,亦都要知道自己有啲嘢係Very confident,未係時候有,咪未係時候囉!」

自由成長
「希望啲家長唔好咁緊張,一定要小朋友讀高學府先搵到食,你睇吓有啲人冇㗎喎,佢哋都好好!」Flora說。看從哈佛輟學的Bill Gates、Mark Zuckerberg便是最佳人辦,所以對養育女兒,她一直抱着少管制、多溝通的態度,「我成日都覺得要畀啲小朋友玩,個女都話我係一個好鬆嘅媽咪,因為佢嘅性格係需要好多空間去創作,我哋都想搵間學校可以畀佢去Discover、Explore,加上我中文唔好,所以幫佢報讀國際學校。」
與其一味打鬧,Flora寧願讓囡囡從錯誤中學習,就算Mira要拍拖都冇意見,「如果你講得太多,佢反感嘅,咁你講嚟都冇用,所以只可以喺背後睇住,有嘢唔啱先提醒。假如佢畀人Hurt,我梗會心痛啦,但係要經歷一吓,實在我都係經歷咗咁多嘢先咁Strong。」幸12歲的Mira心智很成熟,暫未有感情煩惱,反而更關心社會時事,「佢成日都同我哋講“Make sure you are safe”,佢好Aware所有嘢。」她又直言會放下父母包袱,從女兒身上學習,「如果大家有互相學習嘅心態,所有嘢都會好開心。」

;