徐燦傑

2019年8月19日

魔鬼教室 徐燦傑

2018/06/29 (週五)

Gin Lee成功轉內銷?

上個星期多謝老大請我去聽Gin Lee(李幸倪)演唱會,同佢真係好有緣分,記得佢喺接受《娛樂.經濟學》訪問嘅時候,話夢想係喺紅館開人生第一次演唱會,今次達到目標,佢嘅《First of all》演唱會全場爆滿,氣氛熱烈,演出非常成功!恭喜!
演唱會分咗好多唔同部分,其中一Part就係佢屋企人成為台上嘅表現嘉賓,原來Gin Lee家人一直都喺佢嘅音樂世界!呢部分令我諗起台灣嘅A Lin!一個不一樣的「堅Lee 」喺舞台盡情展現,再以家庭力量喺舞台揮灑親情,引起觀眾共鳴,做得非常之成功!
開得演唱會都預咗突破,當然就係跳舞啦!係咪佢強項,冇所謂!舞台表演最緊要話畀人聽係聲色藝俱全!做到嘅話,粉絲就會高興!我睇嗰場嘅特別嘉賓係老友記許志安!見到安仔狀態大勇,更加期待Big 4未來再開演唱會!
Gin喺台上講,當年隻身嚟到香港,住一間好細嘅劏房,用汗水、眼淚、堅持同埋努力,換嚟今日成就!場內仲見到好多嚟自吉隆坡嘅粉絲,竟然遠道而來睇佢表演,可以話Gin能夠做到衣錦還鄉,仲將演唱會以另一個形式帶返老家馬來西亞,就好似將一件出口貨品成功轉為內銷咁!好勁!

徐燦傑
(逢周五見報)
人稱Prof J,大學財金系前教授,金融達人,娛樂.經濟學主理人,諗deal, 做deal成為咗生活嘅一部份!

徐燦傑
;