萬南

2019年11月17日

二五中環 萬南

2017/04/07 (週五)

C組券商難做 頻頻賣身套現

話說耀才證券(1428)發盈警,指未經審核盈利大約跌18%,理由係魚缸收縮,但另一邊廂,舊年係歷來新增券商數目之冠,一口子增加接近50間,同時亦係有史以來最多券商的紀錄,好多老友都跳槽加薪,非常咁熱鬧。
再睇聯交所剛出舊年數據,A、B、C組券商盈利齊跌。所謂A組,即成交首14名經紀,以外資為主,排第15至65屬B組,其餘便屬C組。睇番舊年數據,C組盈利大跌八成,四百幾間券商夾埋賺13億,平均計每間賺唔到三球,少得好憐。缸湖老行尊話近年佣金勁劈價,有好幾間更做零佣,搞到市場相當爛做,對C組券商打擊最大。
老行尊話部分C組券商做到心灰意冷,近期都有意賣盤算咯,因為開新券商需時籌備,起碼要搞4至5個月,所以有啲老闆心急趕科場,就索性買間現成券商返嚟,費用只係多幾球。至於點解有券商長期唔收佣,靠乜維生呢?老行尊形容醉翁之意不在酒,只求你懂的Turnover。

「新雄安」概念
勢惹改名潮
呢個星期,突然橫空爆出一個「新雄安」概念,老實講第一次聽當日係愚人節,仲以為係新成立的社團,認真失禮。值得一讚是今次保密功夫做得一流,唔見鴨子偷步炒呢個千年大計,至於靠炒搵食的老友,自己聞到呢朕鮮味,決定取消假期咪書睇定乜股受惠有得炒。所以話呢,早起的鳥兒有蟲吃。
「雄安概念」一出,好多上市公司都主動出公告,聲稱自己喺呢區有幾多投資,但同時亦戴定頭盔,指不構成投資建議,只係賣花讚花香咁話。不過缸湖有理冇理,已炒咗上去咯。有莊家話市場見雄安有鑊氣,相信好快就有上市公司申請改名,變為類似「雄安控股」、「雄安新城發展」等牌頭,沾下呢股鑊氣砌番轉。

佳源收成期 陸叔都讚好
通宵排隊買樓試過未?呢個情況對佳源國際(2768)嚟講好普遍,除咗因為唔少大客睇好內地房地產市場外,佳源樓盤質素有番咁上下都係原因之一。佢哋第四代住宅產品經過優化後,多咗好多智能化概念,加上着重環保同埋六星級物業管理服務等因素,幾乎每次樓盤開售都「即日清」。
萬南喺佳源上市一周年誌慶晚宴遇到資深股評人陳永陸(陸叔),佢認為佳源好有潛力,單係舊年盈利已經按年大升188.9%。集團喺2008年大量購入成本十分低的土地作儲備,現時及未來幾年將會係收成期,加上業務分散於一至四線城市,就算調控樓市,對整體業務影響亦不大。另外,喺中國房地產開發企業500強測評中,佳源嘅行業綜合排名,由09年嘅第77位,躍升至而家嘅第39位。可見其發展相當理想,值得留意。

萬南
筆者為資深中環
金融界人士
central25@ymail.com

萬南
;