萬南

2019年9月16日

二五中環 萬南

2016/11/25 (週五)

韓妝企淡市心雄 誓將旺角變明洞

個個都話香港零售市道疲弱,連「佔領彌頓道」嘅周大福(1929),最近都話執咗6間租約到期分店。不過,逆市就梗係有奇葩,化妝護膚品集團Amorepacific今年竟然喺香港連開13間新店,營業額仲維持雙位數增長喎。
Amorepacific乃何方神聖?原來係嚟自韓國,近年美妝界大熱嘅氣墊產品(Cushion)就係由佢哋研發,2008年面世至今,呢款產品已經賣咗1億件。Amorepacific旗下雪花秀、Laneige、Etude House、Innisfree 5大品牌已引入香港,唔覺唔覺已經開咗63間舖,單單喺旺角西洋菜街就擁有8間,集團香港市務總監鄭載歡(圖左)直言,有意將條街變成香港「小明洞」。根據「唇膏效應」理論,經濟好,女士買化妝品自然會疏爽啲;至於經濟唔好咯喎,呢啲錢就更加唔可以慳啦,咁先可以增加「軟實力」提高競爭力嘛!所以Amorepacific咁有信心,都唔係冇道理喎。
當然,空有雄心壯志係唔夠嘅,營銷策略都相當重要,所以佢哋都好注重社交媒體宣傳,透過Facebook介紹新產品同發放試用裝,成功引導顧客「入店」,帶動線下銷售;個別品牌仲整埋手機App與用戶互動,據聞Laneige App喺香港已經累積50萬名活躍用戶,都咪話唔犀利。

拆售車場 炒家贏爆廠
政府推出「加辣」招數抗樓市,住宅成交即時急凍,相反車位買賣因為不受加辣影響,資金湧入去掃貨,搞到價格唔夠一個月就急升接近兩成,升勢真係好誇張。呢一浪最大贏家當然係資深投資者,事關早幾年地產商嫌車位收租的回報唔Sexy,所以陸續將車位拆售,有啲地主嫌麻煩,又要分幾巴仙佣畀經紀,索性平少少,選擇一炮過賣畀實力炒家。
炒家眼見車位不斷升值,再篤吓計數機,有啲原來已經倍升,基於「有食唔食,罪大惡極」嘅原則,於是拆細發售,之前更會多做一個步驟,就係大幅加租,藉此粉飾回報率,令買家覺得扺啲。有律師朋友話,單係呢浪搞拆場已忙到嘔白泡,個個炒家心態係唧牙膏式放售,愈拆就愈貴。

輝立出新招
IPO易博大霧
有留意新股(IPO)嘅散戶,都會發覺每逢新股上市前一日都有暗盤交易,呢個平台並非港交所(388)搞,而係新加坡資金嘅輝立證券搞,近年雖然土炮耀才證券(1428)都有樣學樣,砌咗個暗盤平台,不過論規模及認受性始終不及輝立,所以好多時見頂頭槌飛都來自輝立。
抽新股呢瓣生意,據萬南了解,大行睇唔上眼,細證券行亦冇乜肉食,因為借畀客人做孖展嘅錢,其實係向銀行拆番嚟,叫做人有我有,好向客人交代。不過,喺輝立做嘅高層老友爆料,由於公司長期水浸(金鐘總部寫字樓更係自置物業),所以有閒錢借畀客人抽新股,叫做山大斬埋有柴,亦成功幫公司響朵。
新股通常有4日認購時間,券商通常第3日中午就截飛,但輝立一直將死線定喺遲過其他行家兩粒鐘,所以好多時大戶都係趁呢段「空窗期」落飛,令到散戶跟唔切。近日佢哋再推新招,再將死線延後至公開截止日嘅早上,如果抽廿萬銀,倉內有貨底更免按金免息,只收一嚿水手續費,啱晒包括我在內嘅「博大霧一族」。

萬南
筆者為資深中環
金融界人士
central25@ymail.com

萬南
;