萬南

2019年11月16日

二五中環 萬南

2017/02/17 (週五)

連環套現百億 小小超大刁近

舊年萬南講過,做開大刁嘅電盈(008)主席「小小超」李澤楷(圖)不甘寂寞,缸湖傳聞佢正籌備進行大刁。結果當然係冇發生過,小小超全年靜英英,萬南有錯就要認。勢估唔到踏入雞年,小小超已連環做嘢,電盈繼上星期將英國寬頻業務以接近30億賣畀超人旗下長和(001),今個星期再減持香港電訊(6823),合共套現110億「茄殊」。
線人話小小超呢鋪上足子彈,盤路相當認真,似乎有心再做大刁,線人仲話一直以來,小小超辦公室枱頭經常放滿「做刁」計劃書,甚至有好多創科公司主動上門游說入股。但細心一睇,電盈加埋原有現金,已經有160億,足夠食滿漢全席。
其中一單機會比較高嘅刁,係將母公司盈拓旗下嘅富衛保險注資入電盈,由姊妹公司變成子公司。自從小小超2011年收購保險業務返嚟,一直落足心血湊大,不斷替富衛進行資源增值,例如向電盈旗下電視及手機客戶做交叉銷售,近年更夾份共用客戶服務中心,假如收購成功,到時就親上加親啦。

銀行吼肥豬肉
狂開投行部門
同投行老友傾開,過完農曆年再加埋派花紅,通常係玩音樂椅執位遊戲,今年特別厲害,事關好多金融機構都紛紛開檔搞投行,太遠唔好講,近日最新係中銀香港(2388) 計劃新投行,準備招兵買馬。咦,咪住,中銀系早已有中國銀行(3988)旗下的中銀國際做緊呢瓣,點解仲要起過新字頭呢?
講到尾,原來又係錢作怪,事關投行毛利深,只要有刁做,幾乎有贏無輸,就算經濟逆轉,咳人摺埋話咁易,所以有本事嘅銀行,都吼實呢嚿肥豬肉。消息人士仲話,中銀香港以前幫人作嫁衣裳太多,於是決心另起爐灶。

免費首飾工作坊 謝瑞麟新招留客
謝瑞麟(417)主席兼行政總裁謝邱安儀(圖左)早幾日見咗傳媒朋友,佢同萬南講,舊年珠寶零售市道低迷,基數比較低,而今年有見底回穩迹象,但「復甦」就言之尚早;喺啱啱過去嘅新春旺季,銷售成績都只係有單位數升幅,唔算突出。
不過,佢哋嘅擴展大計冇停,其中沙田新城市廣場嘅分店即將開業,樓面面積都超過2,000呎。現有店舖租約方面,每年大約有三分之一分店續租,其中商場舖租金減幅較少,約有10%至15%,而街舖減租就可以去到20%,咁就慳番唔少成本啦!
謝瑞麟仲會同美國首飾設計師Christine Keller合作,將手工藝美術融入珠寶設計,其中尖沙咀同將軍澳分店設有工作坊,可以畀顧客試吓自創首飾,費用全免仲可以將製成品帶走。嚟緊呢類工作坊仲會愈開愈多,話唔定可以儲多一班熟客,即管睇吓佢哋可唔可以喺淡市殺出一條血路啦!

萬南
筆者為資深中環
金融界人士
central25@ymail.com

萬南
;