徐燦傑

2019年8月23日

魔鬼教室 徐燦傑

2019/04/03 (週三)

自願性供款可扣稅

好消息!由4月1日起,打工仔有新扣稅措施,包括強積金自願性及延期年金供款上限,合共為6萬元免稅額,打工仔為慳稅應該如何部署?請見下面生活例子分享:
Prof J:啱啱交完稅,總算履行咗做公民嘅責任!
力奇:梗係啦,你咁高人工!不過話時話,啱啱政府開始有新嘅扣稅措施,就係可以用你嘅強積金自願性及延期年金供款為最高免稅額,上限合共6萬元,由4月1日起開始生效。
Prof J:其實我不嬲都打算提高自願性供款金額,以應付未來退休需要,今次安排應該可以吸引更多打工仔作出自願性供款,起碼趁後生儲多啲錢,唔使亂咁揮霍啦!
力奇:強積金供款分為自願性及強制性兩部分,強制性為僱主及僱員各要按僱員有關入息嘅5%供款,上限為1,500元,超出強制性供款部分,就屬於自願性供款。而修例之前只有強制性供款可扣稅,每年扣稅上限為18,000元,自願性供款則未可扣稅,而新推出的強積金「可扣稅自願性供款」(Tax deductible voluntary contributions),簡稱TVC,為新設可扣稅嘅自願性供款。
Prof J:咁可唔可以自願性供款獲得免稅額之後,然後再立即提取累算權益呢?
力奇:當然冇咁着數啦!TVC與強制性供款之提早提取累算權益要求看齊,包括要年滿65歲或年滿60歲並提早退休、永久離開香港、喪失行為能力、患絕症、小額結餘或死亡,先至能夠提取累算權益。因此TVC需要市民開設一個新獨立的TVC帳戶,以作識別。
Prof J:我識得好多朋友都有月供基金及月供股票,變相吸引投資者用強積金自願供款代替月供基金及股票,除扣稅誘因外,強積金管理費相比低得多呢!如果打工仔薪俸稅已經踏入17%最高稅階,就可盡享6萬元扣稅額,即是每年最多可慳稅10,200元。
力奇:此外,購買年金亦可以扣稅,但要留意須購買延期年金方可扣稅,即是你需要長時間供款,至50歲或以上方可領取年金,而保費總額最少為18萬元,供款期須至少5年,最短年金期為10年。
Prof J:政府可考慮因應通脹因素,未來提供多啲免稅額,變相令市民享有更多折扣認購強積金基金。
力奇:強積金服務提供者為吸引更多客戶開立TVC帳戶,必定會提升服務質素及減低管理費用,因此今次慳稅措施對全港市民都係好消息。

賴錦權(力奇)(逢周三見報)
香港上市公司秘書、大學碩士課程兼任講師、香港特許秘書公會資深會員,致力將知識輕鬆趣味化,作為其人生的生活命題!

徐燦傑
人稱Prof J,大學財金系前教授,金融達人,娛樂.經濟學主理人,諗deal, 做deal成為咗生活嘅一部分!

徐燦傑
;