萬南

2019年9月16日

二五中環 萬南

2017/10/31 (週二)

耀才葉老闆 識借勢宣傳

上星期五晚,港交所(388)紅衫仔搞光榮告別派對,唔少猛人都有畀面出席,咁墟冚嘅場面,當然唔少得萬南一份,單係去聽市場上第一手嘅八卦料已值回票價。最熱爆嘅缸湖新聞,肯定係騰訊(700)分拆閱文集團(772)上市,好多老散都瞓身參與,券商要周圍撲水畀客抽孖展啦。
閱文上市亦吸引一批從未買過股票嘅初哥關注,紛紛趕到證券行開戶,其中陀地大行耀才證券(1428)最誇張,單係閱文首日招股,就已經有400個新客開戶,搞到分行要開OT到夜晚10點先至完成處理。
向來好識趁勢做宣傳嘅耀才大老闆葉茂林(圖),自然好識打呢張牌,向外公布為答謝旗下幾百名員工,每人可免按金抽一球錢嘅閱文,立即得到唔少掌聲。諗深一層,葉生呢招額外開支好少,事關只係免夥記十皮按金,利息依舊要畀。至於另外一項「優惠」,首日上市「贏就員工,輸就歸佢」,聽落梗係誇啦啦,但老老實實,閱文招股反應咁爆,潛水機會又有幾大先?

新地財技頻頻 「兩隻通」惹憧憬
喺紅衫仔告別派對上,另一個話題係最近殼價有冇跌咗,大家睇見藍籌股新地(016)系將間接持有嘅路訊通(888)賣盤,個冧把靚成咁,成交價竟然都唔算太高,大家就一口咬定殼價縮水。但資深老缸湖話,新地有頭有面,嫁女情願搵番戶好人家,所以都唔太計較禮金幾多,至緊要新手湊大公司,加上有GO包底,認為呢排路訊通股價只會炒上唔炒落。
以往新地因大股東家族有爭拗,甚少重組系內結構,但隨着第三代陸續上場,今年變得好不同,除咗賣三條八外,早前更入紙將新意網(8008)轉主板。正所謂二不離三,系內仲有載通(062)及數碼通(315),兩隻市值都係一百億多啲,算係新舊世代公用股。兩者之中,經營巴士(圖)最唔Sexy,而且載通最靚嘅地皮已同新地合作發展得八八九九,加上有5釐息,所以萬南都買咗少少博賣盤。

萬南
筆者為資深中環
金融界人士
central25@ymail.com

萬南
;