徐燦傑

2019年10月16日

魔鬼教室 徐燦傑

2019/06/14 (週五)

為郭子豪加加油

大家都知道我透過《娛樂.經濟學》,認識咗好多演藝界嘅朋友,畢竟大家都喺兩個唔同嘅圈子工作,能夠偶然Crossover,可算係一種緣分!
認識郭子豪,都係因為一次嘅朋友聚會,仲記得嗰次我同佢喺一間餐廳傾偈飲嘢,佢個人高大就唔使講啦,靚仔亦都人所皆知啦,但我諗唔到係佢嘅談吐、同埋思想係非常之完整嘅!大家都知道,入得呢個圈,自然會成為熱中Talking point,加上呢位朋友仔有咁嘅Package,自然就受到大家嘅關注!當然作為「老」友記嘅我,都有去睇關於佢嘅劇集,同埋媒體嘅報道!佢絕對係一個擁有200%勤力嘅年輕人,不斷係演藝圈基本技能方面進修,同埋為將自己變成一個更大嘅「容器」,期望喺演藝事業畫出彩虹!相當值得欣賞!
不過,最近見到「朋友仔」醉駕,自己當然唔開心,我作為「過來人」,明白有時工作壓力大,會喜歡飲酒減壓,我諗我身邊好多喜歡飲酒同埋揸車嘅朋友,都會明白我嘅感受!而家嘅我,慶幸有公司車安排,能夠無拘無束咁享受飲酒嘅樂趣!
之後,我亦都問過子豪呢件事,基本上就係因為佢屋企有事,喺一時情急之下,先至作出呢個衝動行為!當然,活喺鎂光燈下嘅朋友仔,人哋對佢嘅要求一定比常人高,但係人誰無過呢?何必一次就將一個咁有心機嘅朋友仔,一直所作出嘅努力Totally write off 呢!
早幾日,當呢件事正式塵埃落定嘅時候,我同佢通咗個電話,佢個人沉澱咗好多!冇因為呢件事變得意志消沉,正所謂「經一事、長一智」,子豪還是繼續努力,好好裝備自己,喺一個屬於自己的舞台獨當一面,努力,朋友仔!

徐燦傑  (逢周五見報)
人稱Prof J,大學財金系前教授,金融達人,娛樂.經濟學主理人,諗deal, 做deal成為咗生活嘅一部份!

徐燦傑
;