萬南

2019年9月16日

二五中環 萬南

2017/10/17 (週二)

澳博美高梅傳續牌兩年 「等埋6間」先再傾過

萬南上星期又過大海,今次過去主要係拜會一批經常就博彩業出謀獻策嘅智囊,佢哋不時要同政府以及各持份者周旋。智囊話呢段時間超忙,除咗搞賭場禁煙及研究荷官放假禁足賭場外,其實有壇更勁更影響深遠嘅超級大項目一直進行中。登登登櫈,講嘅就係賭牌續期! 
依家澳門賭牌由3個變6個,澳博(880)同美高梅中國(2282)嘅賭牌率先係2020年到期;至於其餘4間金沙中國(1928)、銀娛(027)、永利澳門(1128)及新濠(200)嘅賭牌,則係2022年到期。
點解同一日批牌,會有兩個到期日呢?咁要由2002年開放賭權說起,澳門政府發出3個賭牌畀澳博、永利及銀娛,基於由賭王何鴻燊揸旗嘅澳博,早已在澳門擁有賭場,可以無縫交接即時開檔,所以獲批18年牌。其餘因為需時興建新賭場,一律得廿年牌。後來每個賭牌一拆二,美高梅中國透過澳博得牌,所以都係2020年到期。 
數數手指,澳博同美高梅仲有兩年零賭牌就夠期,偏偏佢哋各自仲有一間位於路氹嘅賭場仍在趕工興建階段,對投資者而言存在唔少疑惑。智囊話曾經旁敲側擊,打探政府點處置賭牌事宜,發現有關當局非常咁口密,其中一位官員只答句「無例可依」,事關澳門回歸以來從未試過續賭牌,而且呢樣關乎整個澳門經濟命脈的福祉,所以每一步都要小心計算。 
消息人士話其中一個較實在的做法,係先將澳博及美高梅嘅賭牌,依照原有條件,破格自動續牌兩年,可一次過同6大賭牌公司講數。消息人士仲話有競爭先有進步,分分鐘再加一兩個新牌都唔定。

萬南
筆者為資深中環
金融界人士
central25@ymail.com

萬南
;