何文俊

2019年10月20日

俊傑論勢 何文俊

2019/06/14 (週五)

港交所的「陰陽平衡」

Prof J:兄弟,我知你呢兩日心情都麻麻地㗎喇,你個人有譚詠麟嘅《傲骨》,又鍾意哥哥嘅《有誰共鳴》,不過我諗你最想點畀特首嘅歌,就係Eason嘅“Shall We talk”!
仲尼:Talk?103萬人上街和平表達訴求,佢都唔同大家Talk啦,無論大家點樣努力表達意見,佢都執意修訂《逃犯條例》,數夠建制派啲票就算,仲嚟個「限時辯論」,市民反抗就搵警察鎮壓,加深警民對立,點Talk落去呢?作為一個土生土長嘅熱血青年,亦作為一個爸爸,見到今日咁嘅境況,警察向代表未來希望嘅青少年狂放催淚彈、槍槍射頭、記者都唔放過,點會唔嬲呀!我諗唱《我是憤怒》啱我多啲囉!而家嘅情況,根本好似一條愈拉愈緊嘅橡筋,最終咪只有斷囉,所以釀成武力衝擊,可以怪邊個?你成日都引述《易經》講㗎啦,「孤陰不生,獨陽不長」,陰陽平衡係非常重要!但我諗阿林太應該唔識囉!
Prof J:你講得好啱,易經都講咗,「冒進」其實係非常之危險,有時有啲嘢,「以退為進」,都係一種好好嘅「進」!而呢個概念其實都可以放喺公司上市嘅過程,好多公司諗住滿足到基本要求,就一定可以上市,點知結果就係浪費青春、時間,同埋金錢!最終得不償失!
仲尼:所謂「條條大路通羅馬」,喺以前嘅唔文明時代,好多時只要擺低過路錢,就可以「暢通無阻」咁行㗎啦!
Prof J:你暗示緊港交所近排嗰單新聞?我都有聽聞過呀,佢哋近年推行上市改革,但係好多新股質素欠佳,有傳媒引述負責新股(IPO)審批嘅前高層,懷疑聯同保薦人及律師行於過程中「不當審批」,向個別上市申請人「放水」,協助唔能夠完全符合上市要求的公司通過新股審批,當中涉及超過30宗申請,包括已上市嘅建築股及餐飲股,都咪話唔轟動!
仲尼:近排大家都估緊邊啲係港交所跟進名單嘅新增成員,包括涉事嘅兩間律師行及最少三間保薦人,你咁醒,冇理由唔知道係邊幾間㗎喎?
Prof J:你又笑我啦?其實醒目嘅朋友,只要上網站搜尋,睇吓IPO新股上市頻道,過去幾年邊幾間公司好似金曲流行榜咁企硬頭三位,之後走勢忽然變得好「黯然」,咪知道發生咩事囉!
仲尼:其實建築同餐飲股,尤其前者近年成為「啤殼」最熱門行業。因為輕資產、易做嘢,合約可以「打嚟打去」,根據統計,由2013年至2018年,已經有超過100隻建築股上市,當中超過三成已經賣殼離場!
Prof J:所以建築股嚟緊能唔能夠維持上市地位,例如有冇充足嘅業務(主板上市規則:13.24)支持,就成為市場最關注嘅事件!我有班餐飲業朋友,當年天真地以為創業板殼價有4億,自己持股51%可以有兩億,好過喺廚房做生意,諗住可以衝出去,踏上上市公司平台,誰不知創業板嘅殼跌到「一仆一碌」,股價長期「不振」,結果成殼眼淚!
仲尼:港交所咪每年都向全球上市集資「冧巴溫」努力嘅?而家市場放風話阿里巴巴選擇喺香港第二上市,如果成功嘅話,今年都叫做交咗數啦,其他細公司咪留返下年囉,其實咁咪仲好,變相杜絕咗啲質素未必有咁好嘅上市公司!簡直係最好嘅「陰陽平衡」啦,林鄭應該去參考吓!

何文俊(仲尼)  
《都市日報》財經及地產版主管,於傳媒行業打拼十數年,不忘初心直言無諱,亦愛化繁為簡,將複雜的財經及地產資訊,以簡單的生活化詞彙告訴讀者

徐燦傑
人稱Prof J,大學財金系前教授,金融達人,娛樂.經濟學主理人,諗deal, 做deal成為咗生活嘅一部分!
(逢周五見報)

何文俊

(逢周五見報)
《都市日報》財經主編,於傳媒行業打滾十數年,不忘初心直言無諱,亦愛化繁為簡,將複雜的財經及地產資訊,以簡單的生活化詞彙告訴讀者

;