萬南

2019年12月10日

二五中環 萬南

2016/12/02 (週五)

波浪大師 重出「缸湖」

有波浪大師之稱嘅許沂光(圖),退隱缸湖已經好幾年,同紅顏知己長住中山別墅歎世界,萬南都曾經獲邀去過參觀。幾年過後,最近知道大師重出「缸湖」搞金融機構,幾年冇見,原來已經70歲,變得滿頭白髮,不過依然好精神,見佢新公司向證監會攞齊1、4、5、9牌,就睇得出規模係大製作。
年紀輕嘅股民,未必聽過波浪大師嘅名,但萬南咁講,老許係圖表派嘅一代名將,好多依家睇圖數浪搵食嘅缸湖老年或中年戰友,唔多唔少都係睇佢文章學嘢,由於扑中幾次大浪,奠定大師地位,唔少人畀月費收聽佢分析,據聞當年搵到盤滿砵滿。
不過,佢老人家卻睇錯樓市,經歷98年金融風暴後,樓市湧現大批負資產,後來樓市復甦,但佢死撐係虛火,最慘係之後佢公司請人,更講明有樓嘅唔請,結果令佢同夥計白白錯失呢浪掃平貨機會。

強國人喪搶500蚊歐元
人仔匯率不斷貶值,不少強國人為怕身家大縮水,搏命將資產走出去,政府為咗嚴打走資行為,近日有傳阿爺做嘢,匯錢銀碼大嘅話,須向外匯局報告。不過你有張良計,強國人有過牆梯,專門幫人做踩界嘢嘅老友就話,近日多咗強國有錢人搶錢,瘋搶兌換面值500元嘅歐元大鈔(圖)。
計起嚟呢張大鈔等同4,100蚊港紙,算係全港流通貨幣之中面值最大,由於甚少人見過,所以又有外號「拉登」。老友話強國有錢人貪其銀碼大,係咁易綑起兩卷都等同一球港銀,袋喺西裝袋肯定神不知鬼不覺,佢自己就試過幫客入滿一個公文袋交貨,足以全數買入太古城3房單位咁話。
「拉登」好罕見,並唔容易大量籌,當中涉及嘅使費唔會平,再加上呢浪歐元同樣跌得甘,強國人依然照樣瘋搶,當中肯定存有買保險嘅意識。咁睇法,人民幣前景如何?你懂的!

萬南
筆者為資深中環
金融界人士
central25@ymail.com

萬南
;