徐燦傑

2019年11月15日

魔鬼教室 徐燦傑

2019/11/08 (週五)

教育股亂世中「發圍」

Prof J:兄弟,大市升完一輪之後,好似儲緊力再上,投資者關注中美貿易談判幾時簽署實質協議,亦憂慮本地社會運動持續,會唔會喺年尾繼續阻礙大市升勢,所以「炒股不炒市」似乎成為投資主流。

仲尼:講到「炒股不炒市」,隨住中國中產階級崛起,家長對子女教育愈來愈重視,有得揀嘅話,我會傾向質素平穩、彈性較大嘅私立教育機構。

Prof J:我就有個選擇喇,中匯集團(382)喺大陸及海外經營民辦高等職業教育機構,喺廣州市分別營運廣東財經大學華商學院,以及廣州華商職業學院,並喺澳洲墨爾本營運一間民辦職業教育機構,以培養專業人才為使命,向學生提供國際化的學習交流機會,提高學生的實踐技能,協助學生未來職業發展。以2017/2018學年商務專業總入學人數計,中匯係大灣區最大嘅民辦商科高等教育集團,而且收入持續穩定增長,由2015/16財年的5.73億元人民幣,遞升至2017/18財年的6.36億元人民幣。公司剛公布截至今年8月底止全年業績,純利大升34%至2.17億元人民幣,表現相當唔錯。

仲尼:仲有一點值得留意,中匯同其他民辦教育股唔同,今年7月係以紅籌形式上市,主要原因係旗下華商學院仍為民辦非企業單位,因應官方要求,學校營辦者唔能夠喺營運中獲得利潤,結餘需用於學校營運,咁就同上市股東利益有衝突;但採用紅籌結構上市,就能夠避免學校性質與股東利益相衝突的問題。

Prof J:我作為半個「教育人」,當然希望一試中匯旗下學院水平,之前就上過廣州,為佢哋舉辦以金融科技為題嘅講座,結果有超過500人踴躍報名,國內學生對香港甚至環球前瞻性的題目,均都表現出濃厚興趣!

仲尼:中匯今年7月以2.85元掛牌,上市首兩個月於窄幅徘徊,直至9月上旬開始發力,近月站穩4元水平後,最新已經挑戰緊5蚊大關,喺「亂世」中可謂交足功課!中匯而家嘅市值已經有49億元,距離獲納入「深港通」的50億市值要求只差一步!一旦獲得北水灌溉,就隨時踏上大好「錢途」,大家可以留意吓!

徐燦傑(逢周五見報)
人稱Prof J,大學財金系前教授,金融達人,娛樂.經濟學主理人,諗deal, 做deal成為咗生活嘅一部份!

何文俊(仲尼)(逢周五見報)
資深傳媒人,於傳媒行業打拼十數年,不忘初心直言無諱,亦愛化繁為簡,將複雜的財經及地產資訊,以簡單的生活化詞彙告訴讀者

徐燦傑
;