萬南

2019年9月23日

二五中環 萬南

2017/03/31 (週五)

打工仔新生代 假期緊要過糧

今個星期,好多打工仔葡萄香港寬頻(1310)(圖)員工,事關佢地首創「湊孫假」,只要擺張三代同堂相返工,無需出世紙證明,即可放3日大假。但某大華資地產商HR高層就話,呢招攞掌聲居多,事關香港寛頻員工平均年齡都係3張幾嘢,唔多人攞到呢個福利喎。不過佢都大讚香港寬頻本身Package已很好,例如全薪產假16周、又有兩日義工假。
佢話,如果湊孫假喺老牌華資地產商出現,情況會好唔同,因為流失率低,所以有一大批做咗廿年以上嘅老臣子耐唔耐食「登陸宴」,就當老臣子生咗兩個仔,每人又啤兩件,條數都好㩒計。
講開假期,有HR顧問阿頭話,大公司會不時檢討Package,睇睇同市場嘅距離,例如某大物流商雖然好肯出高人工吸引後勤專才,奈何大假只得12日,好多後生仔聽見耍手擰頭。呢位頭頭話時代唔同咯,依家講求Work life balance,放假大過天,所以佢都建議啲客加多啲唔同類形嘅假,例如進修假、侍產假等等,佢話有研究顯示,公司愈體恤夥計,「射波」亦相對減少。

輝山「玩失蹤」執董 身份惹市場遐想
上星期五輝山乳業(6863)股價以直插冇水花式暴跌,之後拉閘到而家,缸湖傳聞涉及有人造假數及挪用資金,不過公司已正式否認,唯一肯定係執董葛坤(圖)上星期發信畀公司,指工作壓力大到要休假,要求唔好搵佢,然後就「玩失蹤」唔知去向。最搞笑係呢位葛坤女士,一度盛傳佢係輝山主席兼大股東楊凱嘅愛妻,但喺公司年報又唔見披露關係,最後集團否認。睇番葛坤背景,之前做楊凱秘書出身,學歷唔高,居然可以入局,重係一致行動人士,難怪唔少人咁諗。
專門幫人搞上市嘅老友唔評論輝山個案,但佢話商場中類似似是疑非關係相當多,因為內地實行「一孩政策」多年,好多富二代私生仔女唔可以公開認(情婦更加啦)。最奇怪係仔女連姓都改埋,睇落完全冇關係,卻又半公開地安插入公司做高層,乖巧地避過披露,做刁便可「這麽近那麼遠」。

萬南
筆者為資深中環
金融界人士
central25@ymail.com

萬南
;