徐燦傑

2019年12月11日

魔鬼教室 徐燦傑

2019/08/02 (週五)

從星象看貿戰

Prof J:今日再請嚟我嘅好朋友騏騏,為大家以玄學角度分析大市走向。你記唔記得,你一個月前曾經提及近期出現嘅「水星逆行」同埋「日月蝕」,對投資市場產生嘅衝擊都算事小,更震撼反而係出現有關反修訂逃犯條例而引發嘅一連串社會衝突場面,加上「白衣人肆虐港鐵」事件,對香港市民構成威脅!
騏騏:水星逆行啱啱喺昨天(1/8)完結,群眾不理性思維及運輸上嘅阻滯,情況有望改善,其實早前所講嘅占星理論,亦可應用喺不同層面上,大如天災人禍與國際關係嘅大環境氣候等,小如個人心理及行為,可謂環環緊扣。而我哋平時提及嘅投資市場,只係其中一個層面,而且好大程度上受大環境支配。
Prof J:我最近有個習慣,就是每逢月頭都同你傾下偈,睇吓呢個月點部署。我了解到太陽星座剛由7月中嘅巨蟹座進入8月嘅獅子座,咁又會有乜嘢影響呢?
騏騏:我揀咗兩個重點分析一下。第一個係星座特性。我哋熟悉嘅星座,可以以二分類法(陰、陽)及四分類法(地、水、火、風)嚟區分。巨蟹座分類為陰性/水象星座,而獅子座分類為陽性/火象星座。
Prof J:咁呢兩種分類,又對投資市場分析有乜嘢啟示呢?
騏騏:首先,相比陽性和陰性嘅星座,股市喺太陽喺陽性星座時動力較大。再睇番兩者特性,水性潤下而火性則炎上,而當太陽進入水象星座時,太陽處於弱勢,大市走勢一般會向下;反觀,當太陽進入火象星座時,走勢會由弱轉強,而成交量亦會增加。只要喺利好消息帶動下,有機會由跌勢轉為升勢。
Prof J:但當大部分投資者目光都投射喺中美貿易談判上,我哋可否喺星象睇到談判進展呢?
騏騏:呢個可以參考木星及金星嘅作用力,木星代表擴張,有樂觀、冒險、探索精神,現時運行到射手座內,處於入廟和當令的狀態。木星喺今年4月11日逆行,於8月12日再次順行。同時,喺8月上旬,木星又與獅子座內的群星(太陽、金星、火星)形成了拱(120度)的利好角度。值得留意嘅係金星代表審美與和諧,亦代表人際關係和外交,因此根據嚟緊幾星期嘅星象顯示,中美貿易談判有望達成某程度上的協議,若果成功實現,將會為市場注入上升動力!

徐燦傑  (逢周五見報)
人稱Prof J,大學財金系前教授,金融達人,娛樂.經濟學主理人,諗deal, 做deal成為咗生活嘅一部份!

徐燦傑
;