萬南

2020年1月20日

二五中環 萬南

2017/10/06 (週五)

二五中環 掟一球搞徵文比賽 電子大王咬實母校

掟一球搞徵文比賽 電子大王咬實母校
有「電子大王」之稱嘅南太電子創辦人顧明均,以前喺股壇都係反斗仔,曾經為咗將公司私有化,不惜同證監會鬥法。萬南知道顧生其實好熱血,對於自己堅持嘅事會咬實唔放,就好似佢同母校培正決裂,不停同母校過招,較早前仲入稟高院控告對方誹謗及虛假陳述。
雖然單案稍後會有書面裁決,但萬南聽聞顧生又有新構思,將會公布搞徵文比賽,只限培正學生、教職員、家長及校友參加,題目係「校監誠信對教育之重要性」。因為顧明均一直質疑校監陳之望涉嫌虛假學歷,不適宜領導學校,而陳之望因身兼兩間上市公司太平洋網路(543)及新天地產集團(760)獨立非執董,所以顧明均再向證監會投訴,要求介入調查。
獎金90萬再送iPhone
顧明均而家係全球收藏最多名貴紅酒Screaming Eagle的人,可想而知身家幾咁叠水,佢老人家搞徵文比賽,當然出手非同凡響,各組別冠軍都收茄殊,加埋獎金都有90萬,再另選廿位優異獎,送贈即將推出、價值一皮嘢嘅iPhone X(256GB)一部,換言之總獎金超過一球。
雖然獎金獎品好吸引,但因為要實名參加,得獎者仲要公開朗讀作品,老老實實要學生及教職員參加,等如同學校過唔去,所以相信參加人數唔會太多,至於校友咯,如果有第二代想入培正嘅都耍手擰頭居多。

「財俊」梁志天 上市起雙飛
唔少香港人都聽過著名設計師梁志天(Steve)個朶,遲吓佢又升呢變成金融才俊,事關兩間佢嘅公司都前後腳搞上市,第一間係佢做大股東嘅飲食集團1957 & Co入紙創辦 ,到上星期輪到正業「梁志天設計集團」申請主板上市。
雖然設計公司以Steve做生招牌,但其實佢只係揸三成股份嘅小股東,大股東係內地上市公司江河創建,而Steve更唔係梁志天嘅董事;相反由兒子打骰嘅飲食集團,Steve卻做非執董及主席。

貨櫃屋概念股農林低碳可吼?
本港最新公屋輪候時間重返平均4.7年高峰,社聯早排透露研究推出「貨櫃屋」作為過渡性房屋,傾向樓高4層。為此社聯仲話曾經與社福機構到荷蘭考察「貨櫃屋」,認為有關房屋建築需時較短,亦可依「貨櫃」搬遷,較符合經濟效益咁話。
計萬南話齋,要引入貨櫃屋其實唔使去荷蘭,喺主板上市嘅農林低碳(1069)已經做緊集裝箱房屋,而且正名集裝箱房屋可能更貼切,因為貨櫃始終有個貨字,而家要住人,都係要「以人為本」。單單從農林低碳公司名,以為公司只做林業環保,其實一早已經介入集裝箱房屋業務,而且營業額亦隨住新業務大幅增長,今年上半年營業額就大增12.6倍至5,009萬元人民幣。
睇番中期業績,公司收入大增主要得益於早排收購嘅集裝箱房屋業務,貢獻收益佔總額超過94%,可見轉型已初見成效,公司未來重心都會放於增長強勁的集裝箱房屋及林業管理方面,有關當局日後本港要引入集裝箱房屋,大可找農林低碳傾一傾。

萬南
筆者為資深中環
金融界人士
central25@ymail.com

萬南
;