萬南

2019年12月10日

二五中環 萬南

2017/10/24 (週二)

上市公司總裁 電騙唔見兩球

萬南不時見到某啲廣告,會加咗「上市公司,信心保證」嘅標語,喺普羅大眾心目中,上市公司就好似代表有規模,就連有能力擔當上市公司高層嘅人亦特別醒。不過,香港上市公司有超過兩千間,但其實高層亦有Level之分。
最新一位上市公司高層嘅經歷,更成為上星期嘅報紙新聞。話說某位柳姓上市公司總裁,報案稱較早前接獲自稱「入境處」官員嘅來電,指佢與一宗刑事案有關,於是將電話轉駁至一位自稱係上海公安嘅男子繼續對話,並按男公安指示將190萬元人仔(大約223萬港紙)存入兩個內地銀行戶口,事後懷疑受騙報警求助。
事件一出,缸湖八公立即收風邊位中招,經過多番明查暗訪下,相信受害人係東英金融投資(1140)總裁兼執董柳志偉。根據年報,柳生應來自強國,07年取得湖南大學經濟法學博士學位,其間喺多間內地金融公司打滾,兩年前加盟東英後,負責企業管治及拓展公司的投資者關係及公共關係平台,以支持集團的本地及國際策略。
柳博士既係上市公司高層,仲要係管理金融事業專才,照計對管錢零舍有感覺;加上騙徒手法來來去去都差唔多,以往亦揭發大批類似行騙個案,唔少人都諗唔明點解佢會中招,莫非冇睇警訊!?
萬南問過一位來自內地、來港N年精通廣東話嘅高管,佢話好多內地人來港比較離地,平時只會同番強國人來往,唔多留意香港新聞。而且內地人聽到有官搵自己,普遍都驚咗先,所以更加容易中招。

東瀛遊沖繩插旗 做埋酒店營運商
香港人一向鍾意去日本旅行,就算之前「311大地震」後,有好多傳言話日本輻射嚴重,遊日港人依然年年創新高,舊年就高達184萬人次,比2012年嘅48.2萬人足足多咗接近三倍,當中萬南都佔咗幾次!因應商機無限,主力做日本團做到上市嘅東瀛遊(6882),就諗到喺當地起埋酒店,實行一條龍賺錢咁話!
東瀛遊噚日中午就宣布,啱啱喺日本沖繩買咗四幅土地,佔地面積2,103平方米,作價折合大約6,800萬港元,會用嚟起酒店發展同埋營運,主要迎合公司沖繩旅行團以及自由行產品嘅住宿需求。計我話,6,800萬喺香港分分鐘連一間豪宅都買唔起啦,作為地膽嘅東瀛遊,而家可以用嚟買到四幅地皮起酒店,而幅地皮仲要喺正那霸市牧志三丁目,即係港人經常去掃貨嘅國際通同牧志市場附近,簡直係抵刁啦!

萬南
筆者為資深中環
金融界人士
central25@ymail.com

萬南
;