何文俊

2019年12月16日

俊傑論勢 何文俊

2019/05/17 (週五)

一項養活十八萬人的比賽

Prof J:兄弟!歐洲球季就嚟結束,過埋呢兩個星期,你可以早啲休息吓,唔使捱夜睇波啦!
仲尼:我而家最期待月尾嗰場歐霸盃決賽,希望見證愛隊阿仙奴勇奪歐洲大賽!
Prof J:咪住!你係咪忘記咗呢個係財經專欄呢,點解無啦啦講起足球㗎?
仲尼:係咁嘅,因為我最近識咗一位新朋友,佢來自西班牙,係西班牙足球聯賽(La Liga)嘅香港區負責人Eduard Castell,佢為我介紹咗西班牙聯賽對當地經濟嘅貢獻,聽完之後都獲益不少,好想喺度分享下。大家都知道,英超係全世界最受歡迎足球聯賽,衍生嘅收入亦係全球最高,但其實西班牙聯賽嘅每年營業額,只係僅次於英超,排名第二。
Prof J:作為世界頂級聯賽之一,西班牙聯賽喺門票、轉播、球衣、贊助方面嘅每年收益,應該係以百億元計啦。
仲尼:由於今個球季未完,我哋不如睇吓2017/18球季嘅數字啦。如果單計最高級別嘅西甲同西乙賽事,上個球季嘅收益係高達44.79億歐元,即係約莫393億港元,按年增加20.6%。如果比較番西班牙聯賽喺2011/12年球季嘅收益22.29億歐元,意味佢哋嘅收益喺6年內成功翻倍。
Prof J:作為「歐豬五國」之一,西班牙近年經濟持續不景氣,但當地聯賽收益能夠有咁嘅表現,都算係一項奇葩。主因喺邊度呢?波衫愈賣愈貴?門票年年加價,還是轉播收入大增?
仲尼:分析番數據,當地聯賽嘅直播收入,係由6年前嘅7.28億歐元,大升108%至上個球季嘅15.16億歐元,咁係因為喺2015年,當地賽會喺電視直播權收入安排實施新規定,允許不同球會能夠與外界就電視直播轉播權進行協商,並安排同一級別聯賽嘅比賽時間避免重疊,讓各場賽事能夠覆蓋不同時間,各大球會收入增加之餘,分配方法亦更加平均。打個比喻,西甲兩大班霸巴塞隆那同皇馬以往嘅每年直播收入,大約係其他球會嘅11倍,但改革之後,差距就大幅收窄到3.5倍。至於另一個增長點,主要係球會贊助及廣告等商業收益,以及水漲船高嘅球員轉會費喇。
Prof J:雖然改革後對細球會收入有幫助,但似乎都幾難改變現時寡頭壟斷嘅情況!不過就咁睇,呢項賽事對當地經濟貢獻真係幾大!
仲尼:我記得有個政府前官員講過,體育「沒有任何經濟貢獻」,呢番說話好明顯係錯㗎啦!引述番2016/17球季數據,西班牙聯賽佔當地國內生產總值(GDP)達1.37%,較2012/13球季嘅比重0.72%大增超過一倍,並持續呈上升趨勢;而因為呢項賽事衍生嘅職位達到18.46萬個,佔西班牙在業人口接近1%;仲有,賽事為政府帶嚟嘅稅收,更佔當地政府稅收近1.93%。咁你話佢貢獻大唔大喇!
Prof J:一個聯賽可以養活十幾廿萬人,都咪話唔犀利!睇嚟除咗「娛樂經濟學」之外,我哋都可以鑽研吓「足球經濟學」!下次有機會再傾!

何文俊(仲尼)  (逢周五見報)
《都市日報》財經及地產版主管,於傳媒行業打拼十數年,不忘初心直言無諱,亦愛化繁為簡,將複雜的財經及地產資訊,以簡單的生活化詞彙告訴讀者

徐燦傑
人稱Prof J,大學財金系前教授,金融達人,娛樂.經濟學主理人,諗deal, 做deal成為咗生活嘅一部份!

何文俊

(逢周五見報)
《都市日報》財經主編,於傳媒行業打滾十數年,不忘初心直言無諱,亦愛化繁為簡,將複雜的財經及地產資訊,以簡單的生活化詞彙告訴讀者

;