何文俊

2019年12月10日

俊傑論勢 何文俊

2018/10/19 (週五)

一萬億「嶼島」狂想曲

仲尼:唉,最近真係無乜心機!
Prof J:點解呀兄弟?
仲尼:你冇睇施政報告咩?林鄭決定喺東大嶼興建人工島,據聞造價高達一萬億,但你知香港啲基建成日超時超支㗎啦,有工程師估計可能要萬二億先埋到單,仲高過香港嘅財政儲備,好似焗大家用一萬億「聚賭」咁!如果燒晒啲儲備,第日長者仲有冇兩蚊搭車呢?小朋友仲有冇免費教育呢?醫療系統會唔會進一步惡化呢?到時年年加稅都死啦!
Prof J:你咪悲天憫人啦,呢啲嘢從來都唔到我哋控制嘅,就算有爭議,喺立法會數夠票都會輕易通過!所以你擔心嚟都冇用。不如大家試吓向政府獻計,諗下點樣更好咁利用呢筆錢,又可以解決人口問題啦。
仲尼:咁你有乜高見先?
Prof J:嗱,香港人口不斷增加,就算自然增長係0,每日都有150個新移民落嚟香港,一年有5萬幾個,15年就有大約82萬個。講真,政府使一萬億、等15年先起到個1,700公頃嘅人工島,最多都只能夠容納110萬人,咁點解唔用呢筆錢提供一個誘因,吸引新移民喺大灣區團聚呢?
仲尼:咁又係!反正政府成日都話香港係大灣區城市之一,咁喺其他大灣區城市團聚,咪又係喺個區入面?正所謂「都是大灣區,不用分那麼細」,香港有咩特別吸引力,一定要喺度團聚先?啲樓又細,一街都係人,搭程車都迫死!
Prof J:計吓條數先啦!82萬人,假設每人派100萬,呢筆數就大約係8,200億。不過咁,學林鄭話齋,團聚係人權嚟㗎嘛,我哋梗係要畀人有選擇權嘅,假設當中有一半人接受呢個Offer,即係41萬人吖,咁都係駛4,100億啫。
仲尼:如果每人收100萬,我睇過資料,係足夠喺佛山、順德、東莞同埋江門呢啲大灣區城市嘅小區,購買一間600至1,000呎嘅幾年樓齡單位,絕對住得舒服過香港嘅劏房或者公屋啦!直頭大把室內空間團聚呀!
Prof J:我哋又睇吓政府資料,現時新界北策略發展區棕地有200公頃,仲有洪水橋、元朗南、古洞等地嘅760公項棕地,加埋都有960公頃啦,足夠盛載剩番嗰41萬人有餘。不過發展棕地都有成本嘅,有資深土木工程師話,成本大約係填海嘅五分一,如果填海1,700公頃要使一萬億,咁發展960公頃棕地,照計大約要駛1,100億啦!
仲尼:不過又咁講喎!我哋以為香港有一萬億好多錢咩,其實都係好小兒科㗎咋。好似呢排股市插水咁,淨係一隻騰訊,股價由$476.6高位跌到噚日$281收市價,市值都已經蒸發咗萬八億喇!仲有大家不時幫襯嘅Uber,最新估值都去到1,200億美金,即係大約9,400億港紙!咁你話喇,一萬億係咪好渺少吖?與其攞嚟掟落海或者亂派,不如諗下點樣用嚟幫更多香港人改善生活好過啦!

何文俊(仲尼) (逢周五見報)
《都市日報》財經主編,於傳媒行業打滾十數年,不忘初心直言無諱,亦愛化繁為簡,將複雜的財經及地產資訊,以簡單的生活化詞彙告訴讀者

徐燦傑
人稱Prof J,大學財金系前教授,金融達人,娛樂.經濟學主理人,諗deal, 做deal成為咗生活嘅一部份!

何文俊

(逢周五見報)
《都市日報》財經主編,於傳媒行業打滾十數年,不忘初心直言無諱,亦愛化繁為簡,將複雜的財經及地產資訊,以簡單的生活化詞彙告訴讀者

;