徐燦傑

2019年12月12日

魔鬼教室 徐燦傑

2019/11/15 (週五)

「火水救火」的危機管理

仲尼:兄弟,以往我哋喺呢個專欄講過,喺企業管治嘅角度睇,危機管理(Crisis Management)係非常重要一環,透過對各種危機進行規劃決策、化解處理等,以消除或降低危機帶嚟嘅的威脅及損失。

Prof J:不過睇返特首林鄭月娥喺「反送中」風波嘅表現,就似乎將呢個危機愈滾人愈大喎!

仲尼:自從喺危機爆發後,政府好早之前已經話要「止暴制亂」,但將政治問題由警察鎮壓去解決,客觀結果就係「愈止愈亂」,甚至可以話係「火水救火」。你睇吓警方近日攻打中大嘅手法?山頭上滿布硝煙,搞到好似打仗咁,仲激嬲咗好多和理非,即時趕赴中大加入勇武抗爭行列,因為佢哋覺得攻擊學院係挑戰文明底線!

Prof J:其實而家最大嘅矛盾,係市民同警方嘅對立,這邊廂警方為咗「止暴制亂」,繼續用激進手法拘控示威者,湊數式「拉得愈多愈好」,結果波及好多無辜市民,令民憤升溫;那邊廂,市民對警方使用嘅武力非常不滿,加上「721」、「831」、「101」及「1111」幾宗懸案亟待真相,強烈要求成立獨立調查委員會徹查,甚至話要「解散警隊」。雙方嘅對立,彷彿一個解不開嘅結。

仲尼:梗係啦,如果我係警隊高層,萬一牽連埋自己點算?梗係極力反對獨立調查啦。相反,示威者就覺得今次係〝End game〞,係退無可退,否則大清算、23條、國安法、人面識別系統就係接踵而來,所以冇退下來嘅餘地。

Prof J:要解呢個死結,咁你有乜嘢高見呢?

仲尼:喺呢個階段,其實雙方都需要面子,亦有其不能退下嘅理由,何不以另類形式設立獨立調查委員會,去緩解呢場危機?冇人叫你一定要用呢個名㗎嘛!例如官方可以宣布組成「真相與調解委員會」,由退休大法官、本地及海外刑事專家、民主及建制議員各半,以及社會各界賢達組成,提供調查權力,協助搵出由6月9日至今,關於整場運動嘅各項真相,最後無論係關於被捕人士或者涉案警員所犯嘅錯誤都好,讓特首參考公眾意見,因應不同情節性質作出特赦,咁至少都滿足到五大訴求嘅另外兩三項啦。咁做雖然好似有啲天馬行空,但總好過繼續日日發夢,好似張建宗咁連民怨所在都唔知吖!

徐燦傑(逢周五見報)
人稱Prof J,大學財金系前教授,金融達人,娛樂.經濟學主理人,諗deal, 做deal成為咗生活嘅一部份!

何文俊(仲尼)(逢周五見報)
資深傳媒人,於傳媒行業打拼十數年,不忘初心直言無諱,亦愛化繁為簡,將複雜的財經及地產資訊,以簡單的生活化詞彙告訴讀者

徐燦傑
;