熱話 時尙 食玩 生活 旅遊 娛樂 親子 專欄 着數

高海寧演員的肯定

2019-05-31 (週五) 08:00 上午

入行11年,最近終在新劇《婚姻合伙人》首嘗女一滋味,高海寧對於今次的機會珍而重之!由了解角色到愛上角色,最後被角色「上身」,每個過程都令她感受很深,「我兩個月都係做緊個角色,我唔係高海寧,高海寧係消失咗,好神奇,入戲入到我唔需要再思考。」投入的演出令她獲得不少肯定。

撰文:黃寶華
攝影:fr3d3r1ckl4u
化妝:諺瞳小白

無綫新劇《婚姻合伙人》播出前經歷不少波折,雖早於2017年完成拍攝,但一直播映無期,後因發生「安心事件」,黃心穎出演的《堅離地愛堅離地》被抽起,《婚》才有重見天日的機會。對此,高海寧(高Ling)坦言:「心情係有啲複雜,會因為朋友嘅事情而有啲擔心,另一方面又有啲開心,因為我都好盡力去演,但又冇睇過出街片段, 期待又帶少少緊張。」

擦出火花
高Ling於新劇出演拜金女貝競枝,表面拜金內心脆弱,童年遭父親拋棄,令她不輕易相信任何人,對愛情亦有保留。最初高Ling也誤會角色貪錢自私,了解後才知角色內心複雜,「冇人係天生貪錢,亦都冇一個女仔係唔嚮往愛情,佢畀老竇背叛過,所以唔再相信任何人同愛情 。」透徹地了解後,她覺得貝競枝很可憐,亦漸漸愛上這角色,此後,高Ling竟然覺得對白變得不再難記,就連表情也發自內心地流露。首次擔正令高Ling感壓力好大,又坦言被自己的不自信而影響表現,「我天生好容易緊張,又唔係一個太有自信嘅人,特別係演戲呢方面, 開頭做嘅時候係好迷惘。好彩楊明好快Pick Up 到個角色,我望住佢點演,開始慢慢知要點演。」
楊明和高Ling繼《單戀雙城》後再度合作,兩人同樣首次擔任主角,高Ling 大讚楊明是個好對手。即使拍攝前沒有太多時間作交流,二人依然擦出不一樣的花火,「好多時喺現場夾同撞出嚟,但撞出嚟個火花又幾好,所以本身呢兩個角色已經係好有火花。」女主角挽留男主角的情節令高Ling最為深刻,演出時有種心痛的感覺,「睇完劇本啲眼淚開始湧出嚟, 拍前一日都係好快睇完劇本,知道拍咩,之後又唔敢再睇,Feel到個心好痛。」

渴望得獎
擔正主角的體驗和配角很不同,她形容飾演主角的經歷更豐滿, 「好似一個杯咁,一滴就係一個情節,你不停咁滴會變咗一杯水,呢個人物咪好圓滿同好立體咁。」劇集播出後有不少觀眾稱讚高Ling的演技,她對此感高興,「播咗3集已經有觀眾講,Feel到我唔係高Ling,我係貝競枝,證明大家都好入戲,希望有好口碑同收視,我有信心嘅。」高Ling又坦率地表示比以往更「恨」得獎,因為獎項是對團隊的肯定,更是自己作為演員的肯定,「話畀人聽高Ling係More Than性感,係可以有更加多嘅發展,可以做到一個真正嘅演員,呢啲係我好渴望得到嘅肯定。」
近年受公司器重的高Ling密密拍劇,飾演了不少角色,她渴望能挑戰精神分裂的角色,皆因電影《神探》中劉青雲演技精湛,受影響下高Ling也躍躍欲試,但自知演技未必能處理如此複雜的角色,她現時較想拍攝浪漫的愛情劇,「好嚮往拍一啲浪漫愛情劇, 好似韓劇嗰種浪漫愛情,兩個人好唯美咁,呢種係香港好少拍,香港好少用好多鏡頭去交代浪漫情境,有機會都想拍吓。」