2020年11月26日 

阮小儀 幸運女廚神

2019-07-26 (週五)

現年48歲的阮小儀自09年與出版社高層男友黃志暉分手後,鮮有傳出緋聞,故其感情生活至今仍是一個謎!
記得早年她亦說過已不再心急找對象,多年來都專注為事業打拼,從電台撈入電視台,再於6年多前踩入飲食界,與友人合資開設車仔麵檔「麵麵店」,上月初更與美心集團聯手於將軍澳開分店。本以為小儀早就放棄愛情,但原來快將「入五」的她仍抱有希望,「其實我一向以愛情行先,但個天就係咁,我唔強求嘅嘢就自然會嚟,好似做飲食以為會回落,無端端又有個大集團問你有冇興趣合作,做做吓電台,TVB又簽我做藝員,You never know!」但願其姻緣就像事業一樣順順利利。

撰文:黎寶倫
攝影:陸羽勝

09年,阮小儀於無綫節目《美女廚房》第2輯中,靠打「天才波」誤打誤撞揮低熊黛林、袁詠儀,成功衛冕「第二代美女廚神」,此後亦開啟了其「飲食之路」,「都多謝嗰個節目,因為佢令大家都覺得我識煮嘢食。」她說。

倍添自信
事實上,當年勝出,小儀也大感驚訝,皆因她一直自覺廚藝一般般,「由細到大只係阿媽掛住打牌,初中已經教我買餸、煮飯,所以對我嚟講煮食係好普通嘅嘢,嗰時佢哋叫我參加《美》都覺得好奇怪,咁我咪煮番屋企嘢囉,可能班Artist好少番屋企食飯,好耐冇食媽媽嘅味道,所以咪覺得好好食、好感動囉,但依家諗番自己贏到都幾堅。」
獲得這個殊榮後,不單止令小儀倍添自信,更帶挈她出食譜、為長壽飲食節目《街坊廚神》系列擔任主持,「由嗰次開始明白到唔好睇少自己,即係原來有啲嘢自己做到嘅,但往往因為冇信心,令自己做到都變成做唔到,所以嗰時出Cook Book,我都Sell『阮小儀都做得到,其實你都可以做得好』。」然而,過去小儀也非一帆風順,早年她曾試過炒燶股票,於是頻頻向好友Stephen提議夾份投資做生意,直至12年終於獲對方牽線,加盟原址位於佐敦的一間車仔麵檔「麵麵店」,並聯同數名股東一起把小店發揚光大。

發揚光大
說到背後的一段故,原來「麵麵店」並非由小儀和Stephen創立,只是當初Stephen經常幫襯佐敦的元祖店,覺得好味兼有得做,故多番向老闆建議合作發展,惟次次都被對方婉拒,直至數年後,因不敵貴租與生意衰落,該店轉往附近一條污糟後巷開檔,「Stephen再問佢可唔可以合作,終於感動到老闆,因為佢覺得喺佢潦倒嘅時候,我拍檔都仲想一齊做,真係好有誠意。於是我哋喺廟街嘅第一間合作一齊做,慢慢老闆就退役,由我哋接手做到依家。」
將傳統的車仔麵檔Modern化,再加上明星效應,「麵麵店」很快便擴充至2、3間分店,惜不久還是遇上加租問題,好在當時太古城Pop-Up營運很好,商場方面反邀他們長遠合作,「我哋直頭雙眼發光啦,For一個小品牌喎,同埋你Feel到進駐商場係可以開枝散葉,喺商場我哋都夠膽試新嘢。」小儀興奮憶述。果然,就在上月頭於將軍澳新都城中心開了分店,是次與美心集團合作之餘,更首度引入「手機自助落單」系統,愈做愈出色。

渴望愛情
「我都覺得自己係幸運兒,起碼幸運喺我自己想做嘅嘢度,好好彩呢盤飲食生意,喺搵錢上我未至於有壓力,好順暢。」小儀說。不過,倒是於娛樂事業方面,她總是給予自己一些無形的壓力,「例如今日開咪講啲乜?或者拍戲、拍劇演員係好被動,人哋覺得啱先會搵我,所以我可以係零!雖然雪妮姐同我講過『小儀你得閒就上幾多樓行個圈,等啲監製見到你嘛』,但我做唔到,其實我哋搞得笑嘅都厚面皮、冇話唔落得台,我純粹覺得如果件事搵你,佢自然就會套落你度,好似我同金剛都無端端有套《愛情食物鏈》做主角啦。」
那麼愛情方面呢?幸運降臨了嗎?曾計劃30歲前結婚、30頭生仔,但結果30歲才甩拖的小儀說:「你可能會慢慢邁向絕望,但我又未負面到咁,我覺得人生仲有一口氣都仲有機會,憧憬我仲有,但會改變,以前追求一定要結婚,依家就追求有個伴、知音人、知己就足夠,呢個身份唔一定係丈夫,就算同居男友、密友都一樣,但我依家仍然追尋緊。」

麵麵店
地址:將軍澳貿業路8號新都城中心一期2樓241,250-251號舖
電話:3996 8937
營業時間:星期一至日07:00 - 22:00