2020年11月26日 

都市專訪 狄龍跟魔鬼學習

2019-05-06 (週一)

一代功夫巨星狄龍縱橫影視界50年,戲裏戲外都顯現大俠風範,而每每做訪問,他更是一出口便「字字珠璣,句句真言」,就如早前為處男舞台劇宣傳,無話不談的他即使分享天倫樂、湊仔經,都可以悟出一堆人生大道理。狄龍認為,年少輕狂總會犯錯,最緊要知錯能改,別烙下永久的污點傷害他人和自己,他說:「跟住魔鬼啦,你慢慢就搵到上帝、真理。」尤其踩入娛樂圈,他更時刻警惕兒子譚俊彥切忌被名利沖昏頭腦,做人簡簡單單、平平凡凡已是福氣。

撰文:黎寶倫、攝影:ChaseK
髮型:Mike Ting@HAiR、 化妝:Josephine@J LAB

80年代榮獲多個獎項的經典電影《搭錯車》,當年的監製和編劇黃百鳴,將於今年6月把該片改編為音樂劇,由20至23日假香港演藝學院歌劇院公演,並邀得高志森擔任監製及導演、好戲之人狄龍、閻奕格及沈震軒演出,令人期待!
首踏台板壓力大
《搭》故事講述,收集破銅爛鐵維生的「啞叔」,有日於垃圾堆發現一名女嬰,於是他決定扶養女嬰,並取名為「阿美」。長大後,擁有一把甜美歌聲的阿美獲經紀公司賞識加入演藝圈,隨着她漸漸名成利就,兩父女的距離也愈來愈遠。飾演「啞叔」的狄龍從影60年來,首次參演舞台劇,更要挑戰學手語,早前出席記者會時,他坦言開頭練手語已經打晒冷震,兼血壓由140升至150多,搞到要求醫,問是否仍很緊張?狄龍說:「壓力係有嘅,手語係好快、好頻密,轉接位係好短㗎,年輕時候學就會好啲,年紀大就Pick up得比較慢,我盡量克服佢啦。」
不少老戲骨初演舞台劇都大呻難過拍電影、電視劇,皆因要記台詞和走位,仲要Live Show冇Take 2,狄龍亦笑謂:「我依家連擔心都唔記得嘞。」可後悔接下這套劇呢?「冇退路喇!」他說,又認為人生最難得便是第一次,故會盡情享受整個過程,「既然有咁多年工作經驗,又接咗囉,摸住石頭過河,見步行步囉,我相信高導演會畀一個合理安排我嘅。」
醉酒鬧事悟真理
談到《搭》帶出注意當下、珍惜眼前人的訊息,兒子譚俊彥已育有一對仔女的狄龍,現時最享受的自不然是天倫樂,但他卻自問是個「木訥爺爺」,「平日我都好少話題,始終見到啲孫嘅時間唔長,好多時我都鼓勵佢哋多啲去公園,接觸大自然,人生唔好畀物質取替,唔好一食飯就攞部手機出嚟,細路一喊就畀手機佢,呢種教育我唔接受㗎!」那麼父子可有為教孫起爭執?他灑脫地說:「咁畀番佢教囉,我習慣長話短說,唔想太囉嗦。」
狄龍又續指,為人父母一定要以身作則,千萬別做一些難以彌補的錯事,同時要「清濁並包,善惡兼容」,最緊要識得從錯誤中學習,「我成日開玩笑講『跟住魔鬼啦,慢慢就搵到上帝、真理』,因為你嘅良知話畀你聽,你做錯咗嘞,唔可以咁樣傷害人、傷害自己……」正因年輕時犯下大錯,才令他領悟出這個道理,「當年飲咗酒同啲外國人爭執,於是畀警察拉咗,當時自己喺監牢裏面諗呢個唔係一個人嘅痛苦,而係家人、所有關心你嘅人一齊承受,呢啲係自己造成㗎,自此我都盡量少飲酒。」教仔亦然,正所謂「平凡是福」,他只盼下一代腳踏實地、自食其力。