熱話 時尙 食玩 生活 旅遊 娛樂 親子 專欄 着數

都市專訪 堅持的美學 Robynn & Kendy

2019-04-11 (週四) 08:00 上午

11年出道的組合Robynn & Kendy因參加《中國好聲音》而爆紅,同年更推出了一張國語大碟,但在當紅時期卻沉寂了一段時間。相隔4年才推出大碟,她們坦言當中發生了很多事,「16年對我哋嚟講係好奇怪嘅一年,公司人事調動啦,又唔知點解就咁過咗一年。我哋17年起推出咗一連串嘅單曲,到依家19年想出番一隻碟,去紀錄番我哋成長過後、沉寂過後嘅種種情緒!」

撰文:卓妙燕
攝影:Sing
髮型:KenkiLau@muse hair
服裝:MAGinSHOP
化妝:Circle Cheung @ndnco
場地:銅鑼灣 YoofHex

R&K(Robynn & Kendy)新歌《明陣》和新碟即將在月內推出,Kendy(孫曉慧)指新碟《Curations》是策劃一個展覽的意思,每當去展覽都會有一種洗滌心靈的感覺,她希望聽這張碟的人會有所反思。Robynn(葉晴晴)補充新碟的概念很像一個博物館,「每一首歌都係一個展品咁,我哋想喺呢個博物館入面,放一啲我哋之前嘅回憶。」

曙光再現
出道7年,Robynn坦言可以用「關口重重」來形容她們的音樂生涯,「《中國好聲音》完咗返到嚟香港,有段時間覺得香港大眾會用另一個眼鏡去望我哋,而嗰樣未必同我哋嘅路或者音樂有關,咁嗰段時間係唔知點算好!我覺得我哋好似辛苦建立嘅,畀一樣嘢摧毀咗,對我哋嚟講係一個好困難嘅時候,但因為經歷咗呢啲比較Lost嘅時間,學會識睇化啲嘢,或者唔好咁介意人哋點睇自己!」Kendy也說現在的心境和新歌《明陣》很相符,她說:「遇到困惑、迷惘嘅時候見唔到前面,唔知轉完彎之後會有啲咩事會發生,但只要繼續相信,就會有出口!」
要成為長壽組合不是易事,R&K能走到第7個年頭,原因是她們從沒嗌過大交,甚至還會互相磨合,「大家有一個好強烈嘅共識係R&K擺埋一齊係強過我哋拆開,無論係我哋嘅團隊又好、Fans又好,佢哋一直好支持同畀咗好多力量我哋,所以我哋都係好相信R&K仲有好多成長空間、進步空間,同音樂上嘅可能性。」即使很難說將來會發生甚麼事,但目前她們皆認為R&K在一起就是最完整!

堅持自我
R&K因翻唱經典歌曲得到不少人的關注,雖然翻唱成績比原創歌好,但她們坦言仍想Keep住唱,Robynn表示:「以前曾經會好希望我哋嘅原唱歌會比較多人認識啦,但好幸運係我哋嗰陣喺冇諗過嘅情況下,揀咗呢啲歌去翻唱,原來大家都好鍾意。Look Back我會覺得呢樣令我哋有個好好嘅開頭!」而去年叱咤頒獎典禮,華仔(劉德華)揀選了她們的《荷光》作為最欣賞的歌曲,R&K興奮地說多年前第一首翻唱的歌就是華仔的歌,如果將來有機會合作會感到很震撼!
至於剛結婚不久的Robynn謂二人的生活模式與拍拖前沒有很大分別,「好多年都好老夫老妻,我覺得都係儀式上嘅嘢嚟,同最親嘅朋友、親人去Celebrate呢件事。佢會遷就我多過我就佢,佢係一個好好嘅伴侶,相比之下我覺得我要再努力啲!」雖然結了婚,但Robynn指還未度蜜月,她笑言:「當你好Stable嘅時候日日都度緊蜜月!」而對她來說R&KK更重要一些,希望目前專注在音樂事業上,讓更多人認識二人的組合是最大目標!