熱話 時尙 食玩 生活 旅遊 娛樂 親子 專欄 着數

逆齡的秘密 黎諾懿

2019-09-27 (週五) 08:00 上午

秦始皇窮盡畢生精力追求長生不老,但若然他此時活在香港就不必如此辛苦。皆因港人的平均壽命近年已超越日本人,成為全球壽命最長的地區。近年頻頻主持養生節目的黎諾懿在公仔箱曝光率甚高,除看到他主演的無綫劇《街坊財爺》之外,更有主持綜藝節目《長命不老》,除大談養生之道,這次更化身社長大爆各種養生偏方,如以電鑽、真菜刀來減肥,看似無稽之談但有真人親身實試,至於你信不信,我反正信了!

撰文:Anthony Cam|攝影:陸羽勝

提起黎諾懿,相信不少人都會想到《愛.回家》的馬壯及《BB來了》的Elvis,惟他表示不再拍《愛.回家》拒演馬壯。「呢個角色經歷過好多,係一個好成功要退落嚟嘅人。而我仲繼續行緊,我唔要人哋記得我係馬壯,拍完到依家都3、4年啦,啲人都仲係咁叫,你話幾咁大件事呀!」近年他踏進主持界跳出框框,拍攝不同節目如《歎得好健康》及《懿想得到》等。

 神奇偏方排毒
翻查紀錄,已是第3次主持養生節目,問到為何會頻頻擔任主持養生類節目,他笑說:「其實久唔久做吓都幾好,可能公司知道我拍劇日以繼夜辛苦,同埋我年紀愈嚟愈大,需要保健吓啦! 」傳統養生之道會從飲食及運動入手,但《長》提及的偏方聞所未聞,令到黎諾懿憶述時也哭笑不得。「有集講臭屁醋,佢哋帶咗返嚟香港,真係好難聞,好似昭氣咁點飲呀?隻手唔小心掂到,陣味兩日都唔散,但相傳肯飲就可以千年嘅毒一次過排走,我本身好食得臭都飲唔到,反而嗰集嘅嘉賓陸永有飲到,之後就話真係有料到!」想增高一樣無難度,黎諾懿笑指就算過了青春期依然可以再度發育。「我依家先知原來有啲動作做完可以即高2CM,咩年紀都得,個動作仲要係好簡單,唔使拉扯,可能只係烏低5秒上嚟再度高已經高咗!」
 老婆要求有腹肌
2014年黎諾懿曾拍過一輯瘦身廣告大騷腹肌成為熱話,笑言現時經常被老婆投訴要求減肥,還原番8嚿腹肌!「佢話我唔性感呀,我話你唔諗吓我要湊仔喎,再操真係命都短幾年,所以我話適當啦,喺40歲之前會操番嘅!」有甚麼瘦身操Fit秘方?「其實男仔主要戒食,做運動就會好快瘦,但隨着年紀愈大,消耗就愈高。唔好食油,因為油係致命傷,鹽雖然傷身但唔會致肥,好似啲人做Gym都係食白烚雞胸,都有油㗎,人係化解到豬油、雞油,但當然唔係叫你食扣肉啦,白烚嘅油係OK。」他表示後生時最愛飲酒及食煙,不愛睡覺,惟現時結婚後已戒煙。「老婆話一係煙一係就酒,但依家生咗仔連酒都唔畀掂,只可以喺喜慶日子飲一、兩杯。第日要湊個仔返學,無理由成身酒氣㗎!」
 嫌湯洛雯太肥
問到黎諾懿認為哪位藝人朋友最長命不老,他認為是一同拍攝《長》的主持之一鄧佩儀(Gloria)。「我細個飲水喉水大又唔太錫身,佢竟然將後生嘅本錢去養生,覺得係好奇妙嘅事,佢唔打邊爐又唔食有油有鹽嘅嘢。我除咗做嘢要操Fit個身體之外,長期係咁會冇晒人生樂趣!佢去第二度拍嘢,可以淨係食白飯,仲要話由細到大都唔食零食。」
但黎諾懿則笑指湯洛雯相反愈來愈肥。「佢食嘢唔戒口,覺得食係人生最開心嘅一件事,咁呢個係啱嘅!但真係要戒吓啦,開始脹啦!佢本身係「靚湯」嚟㗎嘛!女仔Fit 啲啦,睇吓高海寧依家幾Fit。同埋點解我會講佢哋?因為我哋係《愛.回家》班底,其他人我係唔會講㗎,驚佢嬲嘛!」公開笑湯洛雯都唔怕,睇嚟真係要私交甚篤先至講得出。