2020年11月24日 

膺金像獎終身成就獎 謝賢笑稱可以收檔

2019-04-03 (週三)

現年82歲的謝賢昨日獲香港電影金像獎公布,成為今屆「終身成就獎」得主,他直言此行養大自己,更笑謂做足60多年終於可以「收檔」了!

《第38屆香港電影金像獎頒獎典禮》將於本月14日假香港文化中心大劇院舉行,大會昨日率先公布兩項最矚目的年度大獎,結果,縱橫演藝界逾60年的謝賢(四哥)奪得「終身成就獎」;自68年投身電影圈當龍虎武師的劉允則獲「專業精神獎」。

對此,四哥回覆傳媒時笑說:「可以收檔啦!我都做咗幾十年,呢個對我嚟講係演藝上嘅大獎,真係好難得。」並謂此職業把他養大,不知自己是否敬業,但自問多年來都盡本分「交足貨畀人」,才令他在演藝圈立足多年,他續道:「個個都係好朋友,個個都係我老闆,我唔會扭擰,亦唔會紅咗就恃寵生驕,係個天畀我食呢行飯。」現時仍有戲癮的四哥,雖然稱會減產,但卻永不言休,而稍後兒子謝霆鋒亦會跟他慶祝。
唔願父子檔
此外,四哥前晚又偕陳煒、黃心穎等出席劇集《法證先鋒IV》煞科宴,他笑言只收了封利是作酬金,更搞笑稱:「我都冇拆,留番將來陪葬。」問到可願意跟霆鋒父子檔拍戲?他即打趣道:「梗係唔制,畀佢搶晒我鏡頭,我乜都輸畀佢,依家係佢哋嘅世界。」並透露與霆鋒約一個月見一次孫仔,但稱未見過前新抱張栢芝的BB。陳煒則自掏5位數筵開15席,慰勞一眾台前幕後,她又透露《法》劇中不乏動作戲分,並謂:「有幕畀賊人挾持,我都畀人劃花咗下巴,同扭親尾指。」