2020年09月25日 

祖里安##讓爸爸們做回大細路

2019-01-09 (週三)

近期爸爸Group群組傳得好「行」係數碼港舉行嘅「龍珠超—體感互動藝術展」,不少由細睇《龍珠》睇到大嘅爸爸經已第一時間撲去,最震撼當然係扮出龜波氣功呢一下,同埋學悟空咁變身撒亞人,諗起都興奮啦!不過更令爸爸雀躍係終於明正言順做個大細路,小朋友陪番爸爸去玩啦!
今次數碼港路途係遠啲(好在金鐘港鐵站有免費巴士),加上要用trip.com個App嚟畀錢買入場券,但為咗《龍珠》呢套咁經典嘅動漫,都值得去啦。是次標明係玩互動體感,意思係用創新科技感應玩家嘅動作或聲效等,然後顯示不同嘅玩味效果,包括「對戰!布洛尼」、「神龍の召喚」、「氣之修練」、「龜波氣功」、「瞬間轉移」等。個人最期待玩變身超級撒亞人,玩時要跟悟空嘅指示學習氣功,擺出經典招牌動作後,就可以變身成超級撒亞人,背後會顯示出儲到嘅氣焰,程式仲會拍下「儲氣」照片!
另外,使出必殺技龜波氣功肯定係每一個《龍珠》迷的夢想,於是乎今次活動就畀參加者先喺屏幕前擺出姿勢,將雙手合上並放喺腰間,再閉上雙眼,最後集全身嘅氣喺手中,再大喊:「龜!波!氣!功!」就可打出架啦! 當然仲唔少得係呼喚神龍啦,當集齊7顆龍珠後,就會獲得一次神龍許願機會,身長7米嘅神龍氣勢磅礡,參加者只要輕輕觸碰螢幕,輸入願望,便會喺大熒幕上投影出嚟,好過癮!
怕囝囝悶,可以帶佢到親子互動遊樂區,有神奇膠囊、發光龍珠池等親子遊戲玩。為滿足龍珠迷,館內展出咗多款珍貴展品,包括歷年電影海報、《龍珠》人物設定等等。期間限定店亦有售多款獨家限定精品如Dragon Ball x 軍事風折疊收納箱及Dragon Ball神龍投杯球,另加T恤、衞衣、CAP帽等。不過留意活動去到1月31日為止。
查詢︰3166 3111
facebook專頁︰www.facebook.com/arcade.cyberport

祖里安
於傳媒工作十多年,由波牛變成兩子爸爸,時刻忙於為家庭安排吃喝玩樂節目。