2020年12月5日 

看淡生死 顧美華

2019-01-04 (週五)

現年66歲的顧美華淡出影壇多年,突然復出為馬浚偉身兼監製、導演、編劇和演員4職的舞台劇演出,從來未接觸過舞台劇的她,願意獻出她的「第一次」,原來是因為二人同樣有親人離世、感受過相同的傷痛。

撰文:卓妙燕
採訪:黎寶倫
攝影:Sing
化妝、髮型:Kimmy@KAZAF
場地:如心艾朗酒店

馬仔(馬浚偉)自編自導自演的舞台劇《生前約死後》將於本月5日至20日在香港藝術中心公演,第一次接觸舞台劇的顧美華坦言有點害怕,「我之前係完全冇接觸過舞台劇,只係睇,做就冇諗過,因為同馬仔識得,都係好偶然大家傾起,原來大家共同都有親人離世,成件事由冇變有!」
失去至親的痛
當時還未有劇本時,顧美華已經答應接下馬仔母親一角,是因為大家都有親人相繼離世,「故事係馬仔同佢媽媽之間嘅事,親人離世係同佢有啲唔同,但感情大家有啲相同嘅地方。之前我妹妹嘅離世,因為佢係自殺,自殺同有病而死所帶畀屋企人嘅傷痛完全係兩回事。」面對妹妹的離世,顧美華明白到生死話題難以避免,「有小生命出世,大部分人都好開心同好願意去講,我自己亦做咗人婆婆,每次有小朋友出世就好有生氣!尤其中國人好鍾意講『生』,但講『死』就好多人會好避忌,我記得我個年代都甚少同父母講呢個話題,但係生同死一樣咁重要,我哋可以接受生應該要同時接受死。」
經歷過這些事,顧美華變得更豁達開朗,「以前會比較執着少少,依家行到人生呢個Moment,前途對我嚟講係咪咁Care呢?我反而會睇吓依家要點同身邊嘅人相處。最主要學一樣嘢,先同自己相處咗先!」隨着年齡的增長,「死亡」對她來說卻有別的含義,「同以前比較,我依家會用另一種態度去睇『死亡』,死係咪一件咁悲傷嘅事呢?要重新思考一吓,因為都係一件無可避免嘅事,每個人都有親人、有父母,當你嘅親人離世,嗰個傷痛係每一個人都會經歷過,咁大家係咪唔好咁避忌去講呢樣嘢呢?」
後生仔傾吓偈
近年顧美華參與多了拍攝工作,不過早在11年,她曾表示不再參與幕前工作,至於現時將近70歲的她卻希望「做得郁就做啦」,「好多嘢要配合,劇本同時間都要啱,因為我依家香港同美國兩邊住,時間啱又冇影響其他嘢咁咪做囉。」移居美國多年,她笑言很想念香港節奏緊迫的生活,「美國生活好休閒,香港係好Extreme,美國一日做一件事都做唔到,香港一日可以做好多件事。你喺美國過得好休閒嘅時候你會覺得悶,雖然好享受,但你會好懷念香港好緊迫嘅生活,迫吓港鐵都開心!」
首次參演舞台劇,顧美華坦言最擔心的是「背對白」,「我最驚會唔記得啲台詞,舞台劇冇得NG,都唔知點算!」她又說兩個長孫雖然不懂中文,但仍會到場支持她。至於回到香港與年輕一代演員合作,她感到很開心並說:「最近有參加一套電影《失蹤》,好開心同啲後生做嘢!同佢哋一齊做嘢,佢哋都好照顧我呢啲老人家,好多時都會講解畀我聽,後生畀人嘅感覺係充滿希望,如果你成日同啲老人家一齊,老人家成日講食藥、睇醫生,有時都幾悶,但後生唔會講呢啲話題。」