熱話 時尙 食玩 生活 旅遊 娛樂 親子 專欄 着數

湯洛雯 隨遇而安

2019-06-04 (週二) 08:00 上午

2012年港姐出身的湯洛雯出道7年,近年來由飾演配角漸漸地擔起大旗,擔任多個重要角色,接下來更會在劇集《法證先鋒IV》擔演重要一角,雖然起步沒有比其他人快,但性格樂觀的湯洛雯很滿足目前所走的路,知足之人,就能每天活在快樂中!
撰文:卓妙燕
採訪:黎寶倫
攝影:fr3d3r1ckl4u

正在播出的無綫劇《婚姻合伙人》中湯洛雯(靚湯)飾演一名護士,性格爽朗且直率,充滿正義感,並與黃德斌有感情戲分,「戲中德斌係出名嘅城中有錢人、花花公子,所以有好多女仔都想親近佢。一開始我對佢有一個壞印象,我就對佢特別唔好,可能勾起佢注意,就由歡喜冤家到慢慢了解咗佢真實性格,最後就暗戀佢!」

女神背後
靚湯是很多人心目中的女神,不過原來私底下是宅女一名,「我唔鍾意出街,同埋我好鍾意打邊爐,屋企人每次同我慶祝,好似生日咁都係打邊爐。」平時最愛留在家裏的她表示很喜歡家的感覺,「鍾意喺屋企因為我鍾意做番自己,我覺得喺屋企就係最舒服,所以成日都留喺屋企。」靚湯從未在另一半面前掩飾其宅女的性格,更認為真心喜歡自己的人應該要接受她的另一面!
性格獨立的靚湯小時候曾到外國讀書,升上大學更租屋自住,她坦言自己是一個缺乏安全感的人,不希望依賴他人,「我比較鍾意自己賺錢自己使,加上細細個就做家姐,冇咩依賴嘅性格,通常都係自己處理自己嘅事。」去年與拍拖4年的羅天宇分手,已單身了一段時間,但靚湯並不強求尋找另一半,「最重要都係相處,我係一個講嘢多過聽嘢嘅人,我會比較鍾意聽我講嘢嘅人。不過依家有屋企人、朋友同事業,生活唔係得拍拖同結婚,我好滿足呢個狀態,咁當然如果有適合嘅人我又唔會抗拒,但我唔會特登去強求。」

知足常樂
與同期港姐出身的朱千雪等人相比來說,靚湯的演藝生涯卻沒有那麼一帆風順,會否覺得自己起步比她們遲?她指從不與別人做比較,「我覺得每個人都有自己嘅人生同故事,如果成日比較會搞到有壓力,我好滿足自己嘅步伐,亦都滿足自己揀嘅路。」在娛樂圈打滾這些年難免要面對低潮期,靚湯稱她不會經常思考自己的將來,反而持着隨遇而安的心態,見步行步,遇到任何事只要此刻開心便夠,靚湯說:「人大咗就愈嚟愈難開心,喺香港搵到份職業你覺得開心已經好好,我將自己平時娛樂嘅時間擺喺工作度,將佢哋Combine,我覺得呢樣嘢係最開心!」
今年可以說是靚湯的豐收年,拍了兩年的倉底劇《婚姻合伙人》見光出街,又因黃心穎發生偷食事件,而臨危受命,頂替對方在《法證先鋒IV》戲分甚重的一角,上位有望的靚湯直言不是一個雄圖大志的人,她笑說:「我做好手頭嘅工作就返屋企瞓覺,努力賺錢畀到生活屋企人,對我嚟講屋企人係我嘅動力!細細個可能唔黐家,但人大咗你就會好珍惜同佢哋相處嘅時間,如果我可以向佢哋表達到一個心意,好似買一間屋畀佢哋,咁會好好囉!」