熱話 時尙 食玩 生活 旅遊 娛樂 親子 專欄 着數

星情飯局 「13」的幸運 鄭融

2019-05-31 (週五) 08:00 上午

「13」,於西方文化是不祥數字;但對於中國人來說,「13」是好意頭,更是鄭融(Stephanie)的幸運數字。
2006年,鄭融憑情歌《紅綠燈》廣獲好評,成為她第一首四台冠軍歌;今個月,鄭融的新歌《13樓的大笨象》一派上台,走勢凌厲,獲各界好評,是四台歌曲流行榜上的冠軍歌。
兩首四台冠軍歌,相隔了13年,能再得到大眾欣賞,鄭融格外感恩。

撰文:Carrie Yip (carrieyip@msn.com)
攝影:Ronald
髮型:Jamie Lee @Hair

煮食之道
灑着細雨的下午,鄭融和我坐在旺角上樓Cafe「茶聊」,大家對繁囂中的這片寧靜地,十分喜歡。「茶聊」的意思:以茶為主、與友聊天相聚的地方。鄭融說:「旺角好難有咁正嘅Cafe,上到嚟會覺得好舒服,同埋嗰個蝴蝶霓虹光管裝飾好靚,係好好嘅打卡位。我對佢哋嘅嘢飲最印象深刻,有自己嘅特色,冇用人工合成高果糖糖漿,用新鮮茶配蔗糖,比較健康。最鍾意飲係『芝芝之桃』,個芝士奶蓋同底部嘅啖啖桃肉,好好味!幾個女仔喺度食吓嘢、傾吓偈、Hea吓,都唔錯。」
談到食,鄭融有自己一套煮食之道。「我比較拿手煮嘅係雞。好多時都係成隻雞咁整,用啲香草去醃一陣,就可以拎去焗。如果一餐食唔晒,啲雞胸肉可以起出嚟切片做沙律,將另一啲雞肉拆嚟切絲,再用嚟炒麵、炒飯都得。食魚嘅話,都會成條咁買番屋企清蒸,食唔晒嘅話,可以起咗啲魚肉,第二朝早煲個白粥,將啲魚肉擺落去滾一滾,就係一碗好好味嘅魚粥啦。一直以來,我都唔鍾意浪費食物嘅!」鄭融外表好玩又潮,但挺精打細算!其實,鄭融天生是不容易被人理解的,要不然,怎會於出道時,便常被媒體指她是黑面神?只要,你和她談下去,便會發現鄭融是個害羞而要裝冷靜的女生,選擇少說話來掩飾,結果,就令人覺得她「寸」,唉!

似磚豆腐
當年鄭融不足20歲便入行,待人處事能有多熟練呢?就算到了今天,鄭融仍是慢熱性格,幸好大家相識多年,自然可暢快的談、暢快的吃。
看着鄭融吃得開心,身為同性,極羨慕她的不胖身型,我一直都覺得是常跑步之故……「跑步,唔係一個咩運動,唔係為咗Keep Fit而跑咁簡單,對於我嚟講,跑步係我一個伴。望落去,我好似好硬淨,但我覺得自己似一磚豆腐多啲,一篤就散!以前,經唔起少少嘅批評,介意人哋嘅說話,好在意一啲網上嘅評論,搞到自己好唔開心,但最弊嘅係我一直冇正視自己性格呢個弱點。做藝人,心理質素好緊要,如果我要繼續喺呢行做落去,就要克服呢個弱點,唔好再咁容易畀人影響到自己嘅信心。」經過「沉寂」,現在鄭融面對很多事情都正面對待,「好多人都有壓力,但係要靠自己去諗通嘅!我有過好艱難嘅時期,多得屋企人關懷,公司依然對我嘅支持,亦好多謝薛凱琪幫我好多,仲教我打坐放鬆心情。每個人都有情緒,只要唔畀情緒凌駕就可以!」
新歌《13樓的大笨象》之所以能打動樂迷,就是鄭融唱出大家的心情,「呢首歌句句都係金句,講嘅唔只係愛情,仲有親情。香港嘅家庭,未必個個都完美,當中會有啲矛盾,屈埋喺心唔想講出嚟,就好似隻大笨象阻住咗大家。《13樓的大笨象》係實況嘅情歌,咁多人鍾意,好幸運,好感動大家一直記得我!」
曾經在鄭融心的正中央,可能撫養了匹象,但現在應該已去了休養。

茶聊
地址:旺角砵蘭街189-191號1樓全層
電話:2989 1707
平均消費:約$150/位
泊車:朗豪坊停車場
營業時間:12:00-23:00