2020年11月24日 

星情飯局 食物有情 麥長青

2019-08-09 (週五)

幕前、幕後,麥長青(麥包)都是一個很實在的男人⋯⋯吃飯,也是。
每次相約麥長青吃飯,都可放心,因為他的要求,是真正食家都會認同的:「有啲餐廳,真係得一、兩味餸好食,我刻意去嗰啲餐廳都只係食佢嗰一、兩味!食嘢,係講求食物嘅質素,我覺得最笨、最唔化算係食裝修!」

撰文:Carrie Yip(carrieyip@msn.com)
攝影:Rico

食物有回憶
搬了新Office在觀塘區,麥長青的飯堂也移師了。觀塘有很多工廈食堂,價錢抵、菜式美味,就是麥長青的心水。
挑選了成業街的華香雞,地方光猛寬敞,端上枱的大多菜式,碟底以木盆盛着上枱,麥長青話:「呢個係老闆發明,有專利㗎,可以保存食物溫度,唔會咁快凍。佢哋嘅煎黃飯,亦係靠呢個設計,令每次都有飯焦㖭!」
不同的食物,都有不同的回憶,麥長青讀書時期便常在華香雞吃午飯。麥長青說:「華香雞有好耐歷史㗎嘞,好多大朋友應該都有印象,唔使計佢啲菜式,啲沙薑、薑蓉已經好味,撈飯都正!不過,老闆之後走去咗開農場養雞,啲雞掂嘞,依家又做番食!另外,我鍾意煎釀三寶係因為啲魚肉,喺順德大,細個時屋企人會將煎魚餅放喺紗櫃入面,可以空口食,係情意結嚟嘅;我又聽啲長輩成日話:吃得苦中苦、方為人上人,想生活好啲,我6、7歲時就頂硬去食苦瓜,到依家係真心欣賞苦瓜嗰陣甘味。人生嘅甜,係要經歷過苦嘅⋯⋯人愈大,就會愈明白係咩一回事。」

貼地的主持
麥長青是個有經歷的男人,他希望透過所主持的節目,把「生活」分享給觀眾,《街市遊樂團》系列,是他覺得做得很滿足的節目。
「我好憎人『假』!喺街市,所有人都唔造作、好自在。我哋已經行勻香港嘅街市,仲去埋馬來西亞、澳門嘅街市,見到好多當地人都好簡單,拍澳門街市嗰陣,仲遇到一啲放咗學嘅小朋友,會去街市食豬腳薑、夾餅,好天真、好純真!」麥長青繼續說:「我自己想做一個好貼地嘅主持,做啲關注民生嘅大眾化節目。『食』,人人都需要嘅,拍街市可以令到大家多了解每一種食材嘅源頭,尤其係依家好多人都唔係好識煮飯。其實,我哋要感恩肯為你煮一餐飯嘅人,當中係有份心意㗎!就好似我有時去到相熟餐廳食嘢,細心去食,係會感受到個廚師煮嘢嗰刻嘅心情,佢心情差嗰陣,真係調味會差咗啲㗎!」人情,絕對可從吃中感受。

華香雞
地址:觀塘成業街15-17號成運工業大廈1樓9-11號店
電話:3486 2909
平均消費:約$200/位
泊車:泓富廣場停車場
營業時間:11:00 - 22:30

主持
Carrie葉嘉儀
傳媒人。喜歡「吃」,皆因非只飽足五臟,更可透看人情。