2020年11月26日 

星情飯局 離開.回來 楊潮凱

2019-05-10 (週五)

無綫劇集《鐵探》已到結局篇,劇中不少角色非常搶鏡,由楊潮凱飾演的大反派「正龍哥」,亦令到觀眾眼火爆!
正當大家認為楊潮凱可憑「正龍哥」在TVB逐步上位,誰不知他卻要往外闖一闖⋯⋯楊潮凱淡定的告訴我:「只係改變咗合作形式啫,TVB係一個好好嘅地方,但呢一刻嘅我需要多啲Input,接觸多啲唔同嘅人、試吓唔同嘅發展、出去學多啲唔同嘅嘢,返到嚟就可以畀多啲新嘢觀眾睇啦。」

撰文:Carrie Yip (carrieyip@msn.com) 攝影:David

演員責任
又寸又狠的「正龍哥」,做事不擇手段,又打女人,絕頂的大奸角,楊潮凱也拿揑得很到位,「正龍哥係一個好狂妄自大嘅人,好乞人憎!不過,我冇諗過演佢會有咩負面嘅反應,反而好Enjoy演呢個奸角。當日,佢哋搵我拍呢個角色時,我即刻話:正呀!」到了現在,楊潮凱憶述當時情景,也難掩一臉的喜悅,「佢哋都話未見過有人接奸角會咁開心嘅。我唔係變態,但入訓練班嗰陣時,知道自己就係想做演員,自然乜角色都想做。依家呢個世代,觀眾會明白同埋會識得分開㗎嘞,所以我根本都冇擔心過。反而最考慮係自己嘅外形點去Carry正龍哥呢個角色,出嚟要似嘅先至係重點!」
於大學時主修創意媒體學院,對於影像、拍攝有一定的認識,加上一直以來的工作經驗,楊潮凱謂:「大家睇到個造型好似好簡單,但只係個頭髮,每一次都係要Set成個鐘,插咗8小執假髮上去㗎!之前試造型嗰時,都試咗兩、三次先至滿意,如果大家鍾意正龍哥個造型,幕後團隊應記一功。」楊潮凱補充:「我就係一個執藥佬,每一次接到一個新角色,我就會係背後個百子櫃裏邊每樣執啲執啲出嚟,呢個百子櫃每一格櫃桶裏面裝住係我一直見過嘅人、遇過嘅事,或者係曾經睇過嘅一啲電影同小說,一直咁儲落嚟嘅。我覺得演員要Serve好個劇本,令出到嚟嘅效果好,係演員嘅責任!」

學懂生活
楊潮凱是一個基督徒,一直相信主對於自己的前路、未來是有一定的安排……當然,也要靠個人的積極和努力!所以,縱使有些人可惜他不再做TVB的「親生仔」,楊潮凱仍是樂觀和正面的!
「我喺TVB呢10年,冇同屋企人去過一個Family Trip,成日覺得可以遲啲先。但人大咗、會諗多啲……依家嘅我,第一件最想做嘅事,就係Plan同屋企人去一個旅行,我覺得雙親仲喺度嘅時間,好好同佢哋一齊去玩吓!人生係咪只得工作呢?我覺得自己嘅生活同工作係需要有一個平衡嘅。」
於2015年,楊潮凱於個人Instagram上Post過:離開,是為了走更遠的路。結果,他去了紐約修讀了一個月的戲劇課程。今次,也該是Refresh一下而已。
「我係一個好鍾意去旅行嘅人,鍾意去同當地人傾偈,記得有一次去到巴西拍嘢,睇到當地嘅人幾咁識得『生活』,我好享受當地嘅沙灘,呢啲可能係好多香港人缺乏嘅,所以我好希望同個女去感受個世界,畀佢接觸多啲大自然。」楊潮凱疼愛女兒,去甚麼地方也想帶着她,「依家我去街食飯,梗係遷就個女先啦。如果同朋友飯局,就好Care係啲乜飯腳,啱傾嘅,坐足一晚都得,但唔太夾嘅話,情願唔去㗎。」
這晚楊潮凱帶我到火炭泰源大牌檔吃飯,所點的菜式地道,非常美味!「呢度係老友黃家樂帶我嚟,嗰次同佢行完山,跟住嚟食,呢度有冷氣同乾淨,嘢食好好,尤其係乳鴿、炒麵同雞粥,啲鑊氣好夠,拍得住一啲大酒家。」今夜的每一碟菜式都火候十足,人情味更是熱辣辣,雖然對我們是有點路遠,但非常值得!

女人街食飯公司
地址:火炭山尾街火炭東熟食市場9E
電話:2697 3656
平均消費:約$200/位
泊車:沙田商業中心停車場
營業時間:17:30-02:00