2020年11月26日 

星情飯局 管好 自己 陳山聰

2019-10-04 (週五)

今年還有3個月,做年結尚早,但對於陳山聰(Joel)來說,已可肯定是成績極佳的一年。
下個月陳山聰和女友Apple共諧連理;工作上,一件接一件,現在熱播的無綫劇《金宵大廈》,初當男一便贏盡口碑,更譽為是今年「神劇」之首⋯⋯愈說愈多,陳山聰會心微笑着。

撰文:Carrie Yip(carrieyip@msn.com)
攝影:Rico
化妝:Chloe yu

緣分的安排
陳山聰的每一項成績,絕不是僥倖,是一步一步的踏出來,當中的每一步,包括了汗水,甚至有些時候,會是寸步難行。
有些經歷的,都會明白人在江湖,辛苦總不免。陳山聰沒怨言,常把台灣超級跑手陳彥博的名言來警惕自己:「心沒有放棄,身體就會跟隨」,就如跑步,跑步令他改變,只要肯跑,就會見到成績,「譬如Fit、健康好D!」。愛情得意,事業路上,也愈走愈順,陳山聰十分感恩。
「我跌過,慢慢咁爬起身,令我更認真去對待每件事,令我更珍惜依家眼前嘅一切。」陳山聰於《逆緣》的「賈卓斌」、《同盟》的「令千佑」已穩坐第二男主角,到最近在《金宵大廈》首任男主角,一人分飾現代保安員「蕭偉明」和60年代的警察「劉旭輝」而大受好評,「男一,我真係冇呢個感覺。喺年半前拍呢套劇,我只係想做好呢個角色,全程投入、享受,依家大家咁鍾意,係成個團隊嘅合作成績。至於最挑戰性係乜?其實同好多人都提過係同靚寶(黑貓)嘅對手戲,一直我好怕貓,但自從呢套劇之後,我克服咗,應該係緣分嘅安排。」

渺小的自己
緣分,的確能令很多事情改變,就像今天陳山聰飲食之道。
「拍完《唐人街》之後,我自己去咗西藏旅行,完全係機緣巧合,受咗好兄弟馬德鐘影響、信咗佛,好多人都話『陳山聰』屬於日本、歐洲,我自己邊有諗過會去西藏嘅啫!但嗰次去到西藏,感受到當地嘅靈氣同寧靜,好Refresh自己,依家都想再去!人好渺小,自己42歲嘞,真係想自己再做好啲,或者作出一啲改變⋯⋯」過往陳山聰經常吃肉,現在豬、牛、羊、雞戒掉,只吃海鮮和蔬果類。為免今次飯局「咁齋」,陳山聰約我到四季菊,「帝苑嘅四季菊,改咗名之嘛,之前叫稻菊,香港出名料理之一,天婦羅都好掂,依家佢嘅秋刀魚Menu,啱晒Season食,日本菜講究食材,比較健康,係我至愛,」可是一回到工作日常,陳山聰就會自備飯盒,沙律和生果為主,「如果唔得閒整,我都係Order素食,茄蛋飯都唔錯!」
有人話做好自己先管理好自己的身體,陳山聰完完全全的做到。

四季菊
地址:尖沙咀麼地道69號帝苑酒店1樓
電話:2733 2933
平均消費:約$600/位
泊車:帝苑酒店代客泊車
營業時間:12:00-15:00、18:00-23:00

主持
Carrie葉嘉儀
傳媒人。喜歡「吃」,皆因非只飽足五臟,更可透看人情。